VOV4.Bahnar - Kơsơ̆ năr 20/4, hlôi pơgơ̆r Hop akŏm tơdrong jang hơdoi ƀar păh Dơnŏ anĭh chĕp pơgơ̆r Kuô̆k hô̆i hăm Trung ương Mặt trận Tổ quốc Việt Nam. Tơ̆ Hop akŏm, Kơdră chĕp pơgơ̆r Kuô̆k hô̆i Vương Đình Huệ hơlen, hôn bơnê kơtang kơ Mặt trận Tổ quốc păng rim hơnĭh jang găh au roi năr roi tơƀô̆h hơdăh hơnăp jang gĭt kăl ‘nŏh hơnĭh jang tang măt kơ Kon pơlei, jing mĭnh hơnĭh jang gĭt kăl lơ̆m tơdrong jang chĭnh trĭ tơ̆ tĕh đak bơ̆n.

Rup hop akŏm

Kơdră chĕp pơgơ̆r Kuô̆k hô̆i sơkơ̆t hơdăh, bơ̆ jang hơdoi ƀar păh Khŭl kơdră chĕp pơgơ̆r Dơnŏ anĭh bơ̆ jang Trung ương MTTQ Việt Nam hăm Dơnŏ anĭh chĕp pơgơ̆r Kuô̆k hô̆i hơnơ̆ng đei lăng ba kơtang, hơmet pơ ‘lơ̆ng, atŏk kơtang. Adoi athei Mặt trận Tổ quốc Việt Nam păng rim hơnĭh bơ̆ jang găh au hơnơ̆ng chă tơchĕng, tơlĕch jang kiơ̆ kơ jăp 5 tơdrong jang tơm lơ̆m nơ̆r pơrô̆ jang đơ̆ng Tổng Bí thư Nguyễn Phú Trọng tơ̆ Hop akŏm Dơnŏ anĭh bơ̆ jang Trung ương MTTQ Việt Nam khei 8/2021; jang ‘lơ̆ng hlŏh dơ̆ng hơnăp jang ‘nŏh jang ‘lơ̆ng chĭnh trĭ lơ̆m tơgoăt tơgoăl hơdrĕch hơdrung, jing gơng tơrŏh klŏh klĕch kơ jăp ‘lơ̆ng ƀar păh Kon pơlei hăm Đảng păng Tĕh đak.

Tơblơ̆ nơ̆r: Amazưt