VOV4.Bahnar - Tơ̆ dêh char Kon Tum đơ̆ng dang 11 jơ gơ măng hei (27/9) pơ tơm đei ‘mi tih. Truh pơ gê hrôih hei, ‘năr 28/9 kŭm hăm ‘mi, kial hơ bŭt roi dêh păng ‘mi kial kơ sô̆ 4 pơ tơm pơm tơ lĕch 1,2 tơ drong hiong răm blŭng a.

Nơ̆r tơ roi đơ̆ng Dơ nŏ anih vei lăng kon pơ lei apŭng Kon Plông, dêh char Kon Tum, sơ lam hăm dêh char Quảng Ngãi, yoa ƀơm đơ̆ng ‘mi kial, dang ei 5 xăh lơ̆m apŭng âu, đei: Đăk Nên, Măng Bút, Đăk Ring, Đăk Tăng păng Pờ Ê kŭp unh điên. Dôm apŭng: Tu Mrông, Kon Plông, Đăk Glei… hlôi đei 1,2 tŏ hnam kon pơ lei kial hlơk păr bơ bŭng; đei anih tĕh hơ lih, anih đak lơ̆p tơ̆ trong gre.

Mĭnh ƀar um rup phĭn găh tơ drong hiong răm đơ̆ng ‘mi kial kơ sô̆ 4 tơ̆ apŭng Tu Mrông

Vă vei lăng sơ đơ̆ng tơ drong arih păng tơ mam drăm kon pơ lei, đơ̆ng kơ sơ̆ păng gơ măng hei, dôm apŭng lơ̆m dêh char pơ gơ̆r chông tơ lĕch dang 600 unh hnam kon pơ lei hăm hlŏh 2.500 ‘nu bơ ngai đơ̆ng tơ ring thŭng, tơ ring hơ mơt đei tĕh hơ lih tŏk oei tơ̆ anih veh ver kơ ‘mi kial sơ đơ̆ng ‘lơ̆ng.

VOV Tây Nguyên – Dơ̆ng: Tơ blơ̆