Kiơ̆ tơdrong hơlen mă blŭng, Đăk Lăk hlôi đei 1 'nu bơngai lôch; lơ hnam tơpăr bơbŭng, minh ƀar tŏ noh tơglơh, mŭk drăm hư răm kơyuơ đak lip; minh ƀar jăl trong ƀơm đak lip. Đại tá Lê Văn Hùng, Phŏ kơdră, Kơdră tơgŭm jang ăn Anih tơm vei lăng khul linh dêh char Đăk Lăk ăn tơbăt, kơtă lơ̆m kơmăng, kơ hrĕng kan ƀô̆, khul linh hlôi đei hơvơn truh, hao ca nô păng gre juăt jang truh dôm tơring đak lip, tơring ƀơm tơklah vă 'nhăk kon pơlei, 'nhăk bơngai 'lŏ, đe hơ-ioh truh hơnih oei sơđơ̆ng.

Đơ̆ng rŏng kơ 'mi kial, kơtă lơ̆m kơmăng, ƀok Đào Mỹ, Phŏ Kơdră Anih jang vei lăng kon pơlei dêh char Đăk Lăk, Kơdră Anih pơgơ̆r jang tơgŭm tơring tơ̆ phương Sông Cầu hlôi truh hơlen tơ̆ tơring răm, pơgơ̆r tơdrong jang hơmet răm, mă kăl noh vei sơđơ̆ng ăn kon pơlei chôt vih hơmet hnam oei, tang găn sar bar kơyuơ đơ̆ng unh hơyuh pơm, tơm 'long păk tơgơ̆ păng dôm tơmam drăm han 'nhueng pơm đei. Dang ei, khul jang kơpal tơ̆ Đăk Lăk pơtoi hơlen măng năr hloi, hơlen lăng tơ̆ dôm tơring oei ƀơm đak lip, tơgŭm kon pơlei chôt vih, sơđơ̆ng tơdrong hơrih, pơ-'nguaih 'long păk tơgơ̆, hơlen lăng sơđơ̆ng unh hơyuh, vă dah hrôih sơđơ̆ng tơdrong hơrih ăn kon pơlei.

Đei băt ‘măng mă blŭng, lơ̆m dêh char Gia Lai đei 2 ‘nu bơngai lôch. ‘Ngoăih kơ ‘noh 2 ‘nu bơngai oei tơ̆ phương Quy Nhơn păng phương An Nhơn jĭ rơka. Chih jô̆ ‘măng blŭng, tơ̆ Gia Lai đei 45 pơbŭng hnam hơlih, hloh 2.400 pơbŭng hnam răm kial hơbŭt hlơk pơbŭng. Kial hơbŭt kơsô̆ 13 hlôi pơm ăn 1 tong duk krăm lơ̆m đak, 3 hơnih trong nơnăm tơ̆ tơring An Vinh tơdrŭt hơlih. Tơ̆ tơring Hoài Nhơn Bắc, đak dơsĭ tŏk brai pơm đak lip hloh 3.000 ŭnh hnam tơter đak dơsĭ, đak lip jrŭ đơ̆ng 10 - 40cm, đei tơring đak lip truh 80cm.

Rơbou hektar ƀa păng ‘long pơtăm hư răm kơtang, lơ kon tơrong, kon kơlap lôch; dơnơm ‘long, jrăng ŭnh hơyuh, kơƀang tơbăt tơgơ̆, ‘măng pơnil pơchăh. Lơ̆m dêh char ưh kơ đei ŭnh hơyuh tơ̆ lơ tơring, lơ tơring ưh kơ gơh chă vă chă apĭnh jet dih băl, truh jơ ‘năr tơroi tơbăt tim mă gơh chă ming hơmet pơ ‘lơ̆ng đĭ đăng. Dang ei, lơ tơring oei hơnơ̆ng dăr lăng, chih jô̆ tơdrong hiong răm, kơ yuơ mĭnh ƀar tơring oei tim mă gơh yak truh, tim mă gơh chă apĭnh jet gia dih băl.

Tơ̆ dêh char Quảng Ngãi, kiơ̆ tơdrong hơlen akŏm tam mă tôm, 50 tŏ hnam tơpăr bơbŭng, hư răm, gah xah Long Phụng răm kơtang hloh hăm 45 tŏ hnam răm kơyuơ phŭt huơ̆r. Tơdrong mă ou ăn ƀôh, tơring tơjê̆ đak dơsĭ păng tơring klŭng jĭ hơnih ƀơm răm kơtang hloh lơ̆m 'măng 'mi kial ou.

Gah trong nơnăm, lơ jăl trong tơm ƀơm răm. Tơdrong mă ou pơm ăn teh hơlih tơ̆ tơring groi kông hli hlơt, mă kăl noh ah teh hlôi hram đak 'mi. Dang ei rim tơring tŏk bŏk chă hơlen chih akŏm tơdrong răm, hơmet tơdăng, atŭm hăm noh hơlen kơjăp dôm tơring hli hlơt vă vei sơđơ̆ng ăn tơdrong hơrih kon pơlei.