Hơnih jang dăr lăng hơlen tŏ ‘mi kial Lâm Đồng tơbăt, 90% hơgăt teh lơ̆m dêh char hlôi đei đak hram kơtang, tơdrong hơmơt đei đak lŏk jroh kơtang tơ̆ rim thoong hơboong đak iĕ păng teh tơdrŭt hơlih tơ̆ teh nak. Rim tơring nhen Đam Rông, D’Ran, Lạc Dương, Nam Ban, Hiệp Thạnh… atŭm hăm rim jăl trong hông hang krang nak trong glung 20, 27, 27C, 28B, Đại Ninh, Prenn hăm Mimosa jei đei hơnăn lơ̆m hla bơar tơbăt hơmơt tơt hloh. Găh tơ̆ Dak Lăk, kiơ̆ đơ̆ng Hơnih jang dăr lăng hơlen tŏ ‘mi kial dêh char, lơ tơring pơlei tơ̆ tơring thŭng, klŭng tơ̆ Dak Lăk hlôi đei ƀôh đak lip; mĭnh ƀar trong nơnăm tơ̆ tơring, pơlei pơla jei đei ƀôh tơhlăk tơhlĭn. Teh tơdrŭt hơlih jei hlôi đei ƀôh tơ̆ lơ groi nak Trong hông hang krang nak tơ̆ Khánh Hoà - Lâm Đồng. ‘Ngoaih teh tơdrŭt hơlih pơm ăn 5 ‘nu bơngai lôch tơ̆ trong hông hang krang nak Khánh Lê, kơ dêh char Khánh Hoà, mơjĭt hơnih teh tơdrŭt hơlih jei đei ƀôh tơ̆ trong krông krang hang nak Ngoạn Mục păng trong krông krang hang nak Khánh Sơn - tơƀưh dih băl Khánh Hoà hăm Lâm Đồng. Khul bơ̆ jang hlôi iung jang tang găn pơgia trong Ngoạn Mục vă sơđơ̆ng ‘lơ̆ng hơ iă.