Tơ̆ tơring 251, xăh Ea Bung, apŭng Ea Súp, tơjê̆ jăl trong 14C, tơkuh hăm Pơgar pơkăp Yok Đôn, lơ ‘long bri tih đơ̆ng 10 – 40 cm, kơjung 3 – 4 met hlôi ƀơm rô̆ tơm, akŏm minh anih.

Kơ hrĕng ha bri ƀơm Kŏng ti pơtăm bri 27/27 koh phă vă pơtăm keo.

Lơ̆m hơgăt bri ƀơm pơrăm, dôm jĭt ha teh hlôi đei pơtăm tơm keo lai hrau hăm hơƀo. Ƀok Nguyễn Thanh Hồng, oei tơ̆ xăh Ea Bung, apŭng Ea Súp, minh ‘nu vang jang hadoi pơm kiơ̆ pơkăp jang ăn tơbăt, bri ƀơm pơrăm noh lơ̆m tơring 251, kơyươ yă Trịnh Thị Hương, dang ei jang Kơdră Kŏng ti pơtăm bri 27/7 vei lăng. Hơgăt bri ƀơm pơrăm pơhlom 100 ha. Ƀok Nguyễn Thanh Hồng tơroi: “Khei 7 xơnăm 2021 yă Hương pơtruh bơngai păng kơmăi kơmŏk mơ̆t chôk pơ ‘nguaih 40 ha bri, đang kơ noh truh khei 5/2022 noh yă athei chôk pơ ‘nguaih truh 60 ha dơ̆ng. Hơkŏp  tơdrong koh phă lơ̆m 2 xơnăm âu ky noh 100 ha. ‘Nao âu khul jang hơlen kơ anih jang găh bri truh hơlen, mă lei duh tam mă ƀôh tơroi kiơ ăn dôm bơngai jang lơ̆m kŏng ti nhôn”

Tơdrong jang vă hơmet, vei lăng păng hơtŏk bri đei Anih vei lăng kon pơlei dêh char Đăk Lăk drơ̆ng lăp axong ăn Kŏng ti pơtăm bri 27/7 iŏk jang kiơ̆ tơchơ̆t kơsô̆ 2959, ăh khei 11 xơnăm 2010. Hơkŏp hơgăt teh bri iŏk jang noh 783,4 ha, tơ̆ tơring 251, xăh Ea Bung, apŭng Ea Súp. Tơchơ̆t tơlĕch vă jang noh hơtŏk bri păng tơmam choh pơtăm jang găh bri hadoi. Bơngai tang măt kiơ̆ khôi lươ̆t păng jang kơdră kŏng ti mă blŭng noh ƀok Nguyễn Văn Quê, oei tơ̆ dêh char Tây Ninh păng truh xơnăm 2017 noh tơplih, pơjao ăn kơ yă Trịnh Thị Hương, oei tơ̆ dêh char Đồng Nai. 

Lơ ‘long bri tih 30 - 40 cm, kơjung 3 - 4 met ƀơm rô̆ tơm.

Kiơ̆ kơ ƀok Nguyễn Ngọc Luật – phŏ Kơdră Anih vei lăng kon pơlei xăh Ea Bung, khei năr âu ki, anih jang kơpal đei băt tơdrong tơroi đơ̆ng kon pơlei păng minh ƀar bơngai jang lơ̆m Kŏng ti pơtăm bri 27/7 tơlĕch pơm jang đei lơ tơdrong glăi. Xăh hlôi jang hadoi hăm Anih hơlen bri apŭng Ea Súp atŭm hăm minh ƀar anih juăt jang kơ apŭng akŏm khul jang hơlen. Kiơ̆ đơ̆ng hơlen, khul ƀôh băt tơdrong vei lăng bri, pơtăm bri, choh jang xa jang găh bri hadoi đơ̆ng anih jang mŭk drăm âu tam mă trŏ kơjăp nhen tơchơ̆t đei Anih vei lăng kon pơlei dêh char Đăk Lăk kĭ pơkăp. Mă kăl, hlôi đei hloh 326/783 ha bri ƀơm răm; pơtăm dôm jĭt ha bri hrơ hrau hăm hơgăt bri hon kơdih; chih akŏm tơroi bri ưh đei trŏ hăm tơroi tơpă găh bri đơ̆ng Anih jang hơlen bri apŭng Ea Súp:  “Ăh jê̆ đĭ khei 9 âu ki, xăh jang hadoi hăm Anih jang hơlen bri apŭng Ea Súp tơlĕch hơlen. Kiơ̆ đơ̆ng hơlen, hơgăt bri ƀơm chôk rô̆ noh oei lơ̆m hơgăt teh pơkăp hơtŏk bri kơjăp xơđơ̆ng, păng anih jang  mŭk drăm đe hlôi pơtăm jê̆ 62 ha ‘long keo lai tơ̆ noh. Kiơ̆ xơnong jang kơpal, đe xư ưh gơh pơtăm bri tơ̆ noh. Khei năr truh, xăh gô pơtoi athei rim anih jang kơpal juăt jang chă hơlen păng xek tơlang tơdrong đei ƀôh âu”

Keo lai đei pơtăm hrau hăm ‘long pơtăm nai tơ̆ teh ‘long bri

Ƀok Nguyễn Như Hoàng – Kơdră anih jang hơlen bri apŭng Ea Súp tơroi, tơ̆ pơkăp jang hơmet, vei lăng păng hơtŏk bri đơ̆ng Kŏng ti pơtăm 27/7 tơ̆ xăh Ea Bung, ưh adrô̆ glăi găh tơdrong vei lăng bri, chôk phă bri glăi, pơtăm ‘long pơm pơnăn xa, mă oei glăi hloi truh tơdrong tĕch răt teh bri. Dôm tơdrong pơm glăi âu noh hli hlơt tơpă, mă lei xơnong xek tơlang noh kơyuơ đơ̆ng anih jang kơpal noh anih hơlen bri hlôi bơ̆ hla bar pơtruh nơ̆r vă xek tơlang dôm bơngai đei tơrĕk. Ƀok Nguyễn Như Hoàng tơroi: “Anih jang hơlen bri apŭng hlôi pơkăl Anih jang hơlen bri dêh char Đăk Lăk athei  Kŏng  ti pơtăm bri 27/7 athei tơblang  mă hơdăh tơdrong tơm mă bri ƀơm pơrăm hloh 326 ha bri păng tơdrong pơhơi lơ̆m vei lăng bri; tơlĕch hơlen tôm tơdrong vă jang pơm hơdăh xơnong jang đơ̆ng Khul Kơdră pơđĭ khul xo păng ‘nao păng dôm bơngai đei tơrĕk truh. Pơtruh nơ̆r hăm Anih vei lăng kon pơlei apŭng pơkăl kŏng ang apŭng Ea Súp xơng iŏk hô sơ tơdrong đei ƀôh vă xek tơlang kơjăp kiơ̆ pơkăp đơ̆ng lươ̆t teh đak”

Tơ̆ apŭng huyện Ea Súp, dêh char Đăk Lăk đei 26 tơdrong pơkăp pơjao bri, ăn thuê bri, pơkăp choh jang xa jang găh bri hadoi, hơkŏp hơgăt jê̆ 20.000 ha. Mă lei, lơ̆m hloh 10 xơnăm tơlĕch jang, lơ tơdrong pơkăp jang ưh đei iŏk jơnei, lê̆ hơtŏk tơdrong phă bri, tơgar teh bri. Lơ̆m noh đei hloi tơdrong tĕch răt pơkăp jang, pơrăm bri vă pơtăm ‘long pơm pơnăn xa, ‘long đunh xơnăm, phŏ noh klăh axong rơvak vă tĕch teh.