Tơring Yang Mao, dêh char Dak Lăk ‘noh mĭnh lơ̆m dôm tơring răm kơtang hloh đơ̆ng đak lip. Kiơ̆ chih jô̆ ‘măng mă blŭng, đơ̆ng rŏng ‘măng ‘mi tih ‘măng mă ou, lơ̆m tơring Yang Mao đei dang 80 pơbŭng hnam răm đak lơ̆p, lơ̆m ou đei 2 pơbŭng hnam hơlih păng 5 tŏ hnam đak jroh hŭt. Lơ trong nơnăm tơ̆ pơlei pơla teh tơdrŭt hơlih, trong ưh kơ gơ̆h chă yơ yak, mĭnh ƀar tơring anai ưh kơ gơ̆h năm tơ̆ ou tơ̆ to. Ƀar tong gơng pơgia tơ̆ jăl trong glung Đông Trường Sơn hư răm, Trong glung 12 tơhlăk tơhlĭn pơm tơnap tap ăn tơdrong năm tơgum djru kon pơlei. Hơnih vei lăng kon pơlei tơring hlôi pơrô̆ akŏm lơ khul jang kơtă, đei kŏng ang tơring, Dân quân tự vê̆ păng rim khul jang, akŏm tơgŭm djru kon pơlei hơmet ming hnam oei, yông năm oei tơ̆ hơnih sơđơ̆ng. Adoi, iung jang hơdoi hăm hơnih jang ming man tĕnh koăng hơmet pơ ‘lơ̆ng jăl trong teh tơdrŭt hơlih vă sơđơ̆ng ăn gre chơ tơmam drăm kăl tơgum djru ăn kon pơlei.

Lơ̆m dôm năr ou ki, 'mi tih pơdui đunh pơm ăn đak blai tơ̆ tu đak ro jăng, pơm lơ tơring tơ̆ xah Krông Bông, dêh char Đăk Lăk ƀơm đak lip, tơklah hơdrô̆. Lơ̆m noh, thôn 27 jĭ minh lơ̆m dôm tơring ƀơm răm kơtang. Kiơ̆ Anih jang vei lăng kon pơlei xah Krông Bông, truh kơsơ̆ năr 17/11, 4 thôn: 27, 28, 29 păng 30 hăm hloh 500 unh hnam kon pơlei hlôi tơklah hơdrô̆ hloi.

Atŭm hăm noh, lơ hơnih đei teh hơlih hli hlơt. Jơnŭm pơgơ̆r tơring hlôi pơgơ̆r hop akŏm tenh kuăng hăm  Anih jang tơgŭm kon pơlei, pơtruh khul jang măng năr hloi, dăng tơlei vă kơ băt, ƀŭ tơngơ̆l vă tơbăt anih đak lip jrŭ, atŭm hăm noh 'nhăk kon pơlei truh hơnih oei sơđơ̆ng. Hloh 100 kan ƀô̆, khul kon pơlei pơm jang atŭm hăm khul jang tơ̆ tơring đei hơvơn jang măng năr; xah adoi iŏk thŏng ca nô păng duk kơ anih jang mŭk drăm vă akŏm ăn tơdrong jang tơgŭm dŏng.

‘Mi tih đunh năr, lơ tơring tơ̆ Khánh Hòa đak lơ̆p kơtang, trong nơnăm tơhlăk tơhlĭn. ‘Mi tih hơnơ̆ng pơm ăn nak man trong glung 27C teh tơdrŭt hơlih, lơ tơmo hơlih klơ̆p trong nơnăm. Pơgê năr 17/11, ‘măng teh tơdrŭt hơlih kơtang pơm ăn rim khul jang tơgum dŏng măh ưh kơ gơ̆h lĕch năm tơ̆ nai. Truh 11 jơ ‘năr đơ̆ng, đĭ đăng 15 ‘nu kang ƀô̆, ƀô̆ đô̆i đei chơ lĕch đơ̆ng hơnih hli hlơt. Hơnih bơ̆ jang hlôi krao akom đei truh mơjĭt tong kmaiw kmŏk gre chưk, kôch hơmet pơ ‘lơ̆ng teh tơmo vă kĕ yak năm truh tơ̆ hơnih teh tơdrŭt hơlih. Tơ̆ Bắc Nha Trang, rim jăl trong 23 Tháng 10, Nguyễn Khuyến, 2 Tháng 4… đak lơ̆p kơtag; bro tơring tơter đak kroong Cái đak tŏk vă jê̆ blai trong nơnăm. Tơ̆ Cam Ranh hăm Cam Lâm, lơ pơlei pơla đak lơ̆p kơtang, đei ŭnh hnam măh tŏk tơ̆ pơbŭng gô chang đe tơgŭm dŏng. Khul bơ̆ jang tơbăt, yông kon pơlei lech veh đơ̆ng rim tơring thŭng, klŭng, tơring ưh sơđơ̆ng.