Kŭm hăm lơ trong tang găn ‘mi tih, đak lơ̆p tơ̆ dôm jăl trong nơnăm, dơnâu đak dôm tơring Nam Trung bộ -Tây Nguyên oei hơmet hloi “4 kơtă”, kơchăng chông tơlĕch kon pơlei đơ̆ng tơring krê hơmơt, ưh ăn đei tơdrong ưh ê. Kiơ̆ trong tơjră hăm ‘mi kial kơsô̆ 13, dôm tơring tơ̆ Nam Trung Bộ - Tây Nguyên oei krao hơvơn ƀato yâu ka tơ̆ đak dơsĭ mât dơ̆ng tơ̆ dôm anih veh ver kơ ‘mi kial; pơchoh hŭt đak lơ̆m dơnâu hơdrol vă gơ̆h mong đak ‘mi tơ̆ dôm dơnâu đak hnam kơmăy unh điên. 1,2 tơring hlôi tơlĕch trong chông kon pơlei tŏk oei tơ̆ tơring sơđơ̆ng adrol kơ 5 jơ kơsơ̆ ‘năr 6/11. 

Tơ̆ hơnăp đei ƀôh krê hơmơt đơ̆ng kial hơbŭt Kalmaegi, Anih vei lăng kon pơlei dêh char Lâm Đồng tơlĕch ăn hla ar pơgơ̆r jang kăl, athei rim anih jang, tơring ƀơm truh tơlĕch trong jang tang găn păng tơjră hăm kial hơbŭt, ‘mi tih đơ̆ng rŏng kơ kial hơbŭt. Kơdră Anih vei lăng kon pơlei Lâm Đồng athei rim tơring, tơring gĭt kăl Phú Quý kiơ̆ răp hơlen kơjăp tơplih tŏ ‘mi kial, roi tơbăt tơtom truh kon pơlei, ưh kơ lê̆ đei ƀôh tơdrong pơm pơ hơi, ưh kơ ‘lơ lŏ. Hơdai hăm hơlen lăng, dăr lăng rim tơring kon pơlei oei tơ ter đak krong, thong đak, tơring thŭng kơđeh, đei hơmơt teh hơlih, kơchăng trong jang yông tơklăh kon pơlei truh hơnih oei sơđơ̆ng.

Vă tơjră hăm ‘mi kial kơsô̆ 13 (Kalmaegi) oei vă tơhlu tŏk tơ̆ kông, tôch krê hơmơt, kăn ƀô̆, linh Ƀô đô̆i vei lăng tơring sơlam dêh char Gia Lai adrin jang hơdoi hăm khul kơdră tơring tơgŭm ăn kon pơlei chô̆ hơmet, tơjră ming hnam, tung pơdŭ tơmam tŏk tơ̆ anih sơđơ̆ng; atŭm hăm ‘nŏh pơgơ̆r trư̆k prăt măng, prăt năr vă tơtom tơjră hăm rim tơdrong kơnê̆.

Đĭ đăng khul linh vei lăng tơring sơlam tơ̆ đak dơsĭ Gia Lai đei 18 khul, hăm 280 ‘nu kăn ƀô̆, linh kŭm hăm 19 tŏ gre tih, 185 tŏ gre hon đa, 20 tŏ ƀato păng ca nô đei hơmet tôm tơmam, kơmăy kơmŏk vă bơ̆ jang dŏng tơgŭm. Đại tá Trần Tiến Hải- Phŏ Kơdră Anih chĕp kơ̆l pơgơ̆r khul linh, pơm hloi Yŏng khul linh vei lăng tơring sơlam dêh char Gia Lai ăn tơbăt: dôm kơđông linh vei lăng tơring sơlam hlôi hơtŏk kăn ƀô̆ jur jang tơ̆ dôm tơring krê hơmơt, vang trư̆k, roi tơbăt ăn kon pơlei, athei kon pơlei kơchăng, ưh gơ̆h lăng pơhơi ‘mi kial. Dôm anih jang athei hơmet kơjăp kơđông, anih mong, anih oei xa veh ver kơ ‘mi kial ăn kon pơlei. Phe ƀa tơmam xa, pơgang hơmet jĭ athei ‘măn hơmet mă tôm.