VOV4.Bahnar - ‘Măng hop akŏm mă 4, Kuô̆k hôi jăl 15 gô hop akŏm kơtă lơ̆m 21 năr, pơgơ̆r blŭng lơ̆m pơgê năr 20/10 păng pơgơ̆r pơtôch lơ̆m kơsơ̆ năr 15/11. ‘Nau tơdrong kơtơ̆ng ang đei Dơnŏ anĭh chĕp pơgơ̆r Kuôk hô̆i tơbăt tơ̆ Hop akŏm tơbăt hăm khul chĭh kơtơ̆ng ang kơsơ̆ năr 17/10. Tơ̆ hop akŏm au, Kuôk hô̆i gô vă pơdrơ̆ng 7 tơdrong vă pơjing Khôi luơ̆t, 3 tơdrong vă pơjing Tơchơ̆t. Kuô̆k hô̆i jei tơgop nơ̆r 7 tơdrong vă pơjing Khôi luơ̆t, lơ̆m au mă kăl Tơdrong vă pơjing Khôi luơ̆t Groi tĕh (hơmet ming). Lăng hơlen rim hla bơar tơbăt bơ̆ jang găh: lăng hơlen pơtôch jang kiơ̆ trong pơ pro jang atŏk tơ iung mŭk drăm-tơpôl, kon jên jang tĕh đak, trong tơmơ̆t jên jang đơ̆ng kon jên tĕh đak. Kuô̆k hô̆i dăr lăng hơlen tơdrong jang “Tơdrong jang kiơ̆ trong bơ̆ jang, khôi luơ̆t găh pơm kiơ̆ pơkom, tang găn brăh brư jăl jang 2016-2021. Đei ƀơm trŭh tơdrong đak xăng đak dau khei năr au ki pơm ăn kon pơlei tơtok kơtang, Kơ iĕng Kơdră Dơnŏ anŭh bơ̆ jang Mŭk drăm kơ Kuô̆k hô̆i Nguyễn Minh Sơn pơma hơdăh, tơdrong Khŭl kơdră Tĕh đak kăl pơrô̆ athei jang vă rim hơnĭh bơ̆ jang pơjing trong jang vei lăng kơ jă tĕch mơdro trŏ lăp, adoi sơđơ̆ng đei iŏk yua hơ iă kơ kon pơlei, kơ hơnĭh mơdro sa adoi nhen đei iŏk yua rim hơnĭh bơ̆ jang tơm răt tơmơ̆t tĕch tơlĕch hăm tĕh đak đe păng rim hơnĭh tĕch mơdro đak xăng đak dau.

VOV/Amazưt tơblơ̆