VOV4.Bahnar - Pơgê au, Kuô̆k hô̆i hơnơ̆ng pơgơ̆r pơma dơnŭh tơ̆ hnam hop akŏm găh tơdrong vă pơjing Tơchơ̆t găh jang pơlong năng mĭnh ƀar trong bơ̆ jang kăl atŏk tơ iung dêh char Khánh Hòa. Mơ̆ng đŏk tơbăt Hla bơar pơtrŭh ăn, hla bơar tơbăt bơ̆ jang dăr lăng hơlen găh tơdrong tơlĕch kon jên tŏk iŏk ăn tŏk iŏk dơ̆ng, dơ̆ng pang tang măt Khŭl kơdră Tĕh đak jing ƀơk ăn kon jên bơ̆ jang tĕh đak păng pơma dơnŭh tơ̆ hnam hop akŏm găh găh tơdrong ‘nau. Kơsơ̆ au, pơgơ̆r 2 năr 1 poăt apĭnh jet păng tơl hơdăh nơ̆r apĭnh jet. Kơdră chĕp pơgơ̆r Dơnŏ anĭh tơm vei lăng Chŏh jang sa păng Atŏk tơ iung tơring tơrang Lê Minh Hoan vang tơl hơdăh nơ̆r apĭnh mă blŭng hăm rim tơdrong găh choh jang sa. Hơdrol kơ ‘nŏh, lơ̆m kơsơ̆ năr 6/6, Kuôk hô̆i hlôi pơma dơnŭh găh pơtôch jang kiơ̆ Tơdrong tơchơ̆t kơsô̆ 66 đơ̆ng Kuô̆k hô̆i păng tơlĕch jang tơdrong vă jang pơm trong glung Hồ Chí Minh tơ̆ hơnăp au kơnh. Trŭh dang ei, tơdrong vă jang hlôi 2 ‘măng jang ư̆h keh đang trong tơlĕch jang, oei 171 km tim mă tơmơ̆t jang. Lơ nơ̆r tơgop ‘nau jing tơdrong vă jang tơm kơ tĕh đak kăl tơlĕch ăn kon jên jang vă ming man keh đang keh đang tĕnh koăng đơ̆ng găh tu trŭh tơ̆ pơbăh; athei Khŭl kơdră chĕp pơgơ̆r tĕh đak ‘măn ăn kon jên vă ming man keh đang hloi rim jăl trong uơ oei vă trong glung Hồ Chí Minh ming man keh đang lơ̆m khei năr kơnh.

Tơblơ̆ nơ̆r: Amazưt