VOV4.Bahnar - ‘Năr 16/01 truh, tơ̆ Hnam hŏk Kanh sat kon pơ lei, Tơ drong jang Năr giĕng ƀrê ‘măng mă 14 gô đei pơ gơ̆r. Tơ drong jang sơ năm ‘nâu iŏk đei tơ drong tơ rĕk đơ̆ng dôm anih tơm, anih jang kơ pal, mă loi jĭ tơ drong vang jang đơ̆ng hlŏh 40 dêh char, plt, pơ hlom năng gô iŏk đei đơ̆ng 45.000 - 50.000 tơ pu pham.

Hôp roi tơ băt Tơ drong jang Năr giĕng ƀrê sơ năm 2022

Mă đơ̆ng tam đei tơ lĕch jang tơ pă, mă lei đơ̆ng khei 11 sơ năm sơ̆ truh dang ei, dôm anih plang song pham kơ Năr giĕng ƀrê tơ̆ 15 tơ ring hlôi iŏk đei vă jê̆ 6.000 tơ pu pham, pơm lăp hăm tơ drong pơ truh pham dŏng hơ met ăn bơ ngai jĭ  adrol, lơ̆m păng đơ̆ng rŏng kơ Têt Nguyên đán Nhâm Dần 2022.  

Nơ̆r tơ băt “Plang song pham dŏng bơ ngai – Tơ drong arih boăl păng inh” hơ nơ̆ng pơ gơ̆r lơ̆m hlŏh 10 sơ năm iŏk đơ̆ng Năr giĕng ƀrê đei Ƀăo Tiền Phong tơ lĕch, jing nơ̆r athei ‘lơ̆ng hơ iă mưh truh sơ năm ‘nao vă akŏm tơ drong tơ rĕk đơ̆ng dôm anih jang, khul grŭp păng kon pơ lei găh lơ sơ năm, tơ ring tơ rang, hơ drĕch hơ drung, tơ drong jang vang akŏm plang song pham.

Dơ̆ng: Tơ blơ̆