VOV4.Bahnar - ‘Năr 30/8, Anih jang Đoàn dêh char Dak Lak pơ gơ̆r tơ drong jang Năr Ĭnh ‘mêm kơ teh đak nhôn sơ năm 2022 hăm lơ tơ drong jang hơ iă. Năr Ĭnh ‘mêm kơ teh đak nhôn tơ̆ Dak Lak sơ năm ‘nâu đei lơ tơ drong jang nhen Lêh mít tinh, chao kơ păng vang năm pơ rŏ tơ̆ Cham să 10/3 (pơ lei tơm Buôn Ma Thuột), hơ ri hơ soang păng pơ long kơ dâu “Mobirun – Ĭnh ‘mêm kơ teh đak nhôn”, hop akŏm Hơ pơi ‘meh đơ̆ng hơ druh tơ dăm; Pơ long tơ roi tơ băt ƀai hơ ri kach mang, hơ druh tơ dăm hơ ri brông păng tôn reh bơ̆n tĭng nĭng, chĭng chêng; Lêh tơ băt 66 sơ năm năr joăt joe Jơ nŭm vei lăng hơ druh tơ dăm Việt Nam păng pôk pơ ư hơ druh tơ dăm hơ gei lơ̆m dôm tơ drong jang.

Lêh chao kơ

Tơ drong vă kơ kuh chơt hơ iă jơ nei hop akŏm rim tơ ring yak truh Hop akŏm Đoàn lơ̆m teh đak ‘măng mă 12, kơ kuh chơt hơ iă Năr Quốc khánh (2/9) păng dôm năr lêh tih kơ teh đak.

Hloh 1.500 ‘nu hơ druh tơ dăm dơ̆ng proh chư “ Ĭnh ‘mêm kơ Việt Nam" tơ̆ lêh chao kơ

Rim tơ drong jang adoi đei dôm tơ drong jang hơ dăh, kiơ̆ đơ̆ng ‘noh sơng đei lơ khŭl hơ druh tơ dăm vang jang kiơ̆ tơ năp, pơm đei iŏk yua 1 jơ hngơ̆m đon akŏm hơ druh tơ dăm tơ̆ dôm anih jang đoàn, khŭk lơ̆m dêh char.

Thuem: Tơ blơ̆