VOV4.Bahnar - Năr 25/2, Dơnŏ anĭh chĕp pơgơ̆r Ƀô̆ đô̆i vei lăng sơlam tĕh đak dêh char Dak Lăk iung jang hơdoi hăm apŭng Ea Sŭp pơgơ̆r Năr Lêh pơđĭ kon pơlei vang vei lăng sơlam tĕh đak sơnăm 2022 tơ̆ tơring sơlam tĕh đak Ia Rvê. Dêh char Dak Lăk đei trong sơlam tĕh đak atăih trŭh 73km tơtil hăm dêh char Mondulkiri, Campuchia. 

Kơdră chĕp pơgơ̆r apŭng Ea Sŭp pôk tơmam drăm ăn rim kơđông ƀô̆ đô̆i vei lăng sơlam tĕh đak

Tơring sơlam tĕh đak dêh char Dak Lăk đei 4 tơring hăm 51 pơlei găh 2 apŭng Buôn Đôn păng Ea Sŭp, jing tơring erĭh sa kơ hlŏh 22.000 ‘nu kon pơlei găh 26 hơdrĕch hơdrung. Dôm sơnăm au ki, Khŭl kơdră Đảng, Kơdră chĕp pơgơ̆r rim tơring hlôi iung jang hơdoi kơ jăp hăm Dơnŏ anĭh Ƀô̆ đô̆i vei lăng sơlam tĕh đak vei lăng năng tông kơ jăp groi tĕh, sơđơ̆ng tơring sơlam tĕh đak, sơđơ̆ng dơ̆ng kơ jăp tơring tơrang. Mă hơdăh, tơ̆ rim tơring sơlam tĕh đak hlôi đei 26 khŭl, hlŏh 480 ŭnh hnam, hlŏh 1.600 ‘nu bơngai chĭh hơnăn vang vei lăng trong sơlam tĕh đak, hơdrơ̆ng sơlam tĕh đak. ‘Ngoăih kơ ‘nŏh, kon pơlei tơ̆ 51 pơlei tơring sơlam tĕh đak kĭ pơkăp vang iung tơ jră tang găn khŭl yoch, khŭl pơm glăi tơdrong tơpôl.

Tơblơ̆ nơ̆r: Amazưt