VOV4.Bahnar - Pơ gê hei tơ̆ Hà Nội, pơ gơ̆r hop akŏm mơ̆ng păng tơ lĕch jang kiơ̆ tơ drong Tơ chơ̆t 06 đơ̆ng Anih tơm Chinh trĭ ‘năr 24/1/2022 “găh tơ proh trong pơ jing vei lăng păng atŏk tơ iung kơ jăp tơ ring kơ drâm Việt Nam truh sơ năm 2030 trong jang truh sơ năm 2045”.

Kiơ̆ tơ drong tơ chĕng hơ len đơ̆ng Anih chih jô̆, kơ sô̆ pơ jing tơ ring kơ drâm tơ̆ Việt Nam sơ năm 2010 ‘nŏh 30,39%, truh sơ năm 2020 ‘nŏh 36,8%. Tơ drong pơ jing tơ ring kơ drâm oei bơ̆ jang pran hlŏh tơ̆ 2 tơ ring jang mŭk drăm, tơ pôl gĭt kăl ‘nŏh jĭ Tơ ring tĕh tơ măn đak krong Hồng păng tơ ring Đông Nam Bộ, tơ răn hlŏh tơ̆ tơ ring groi kông găh Tu.

Pơ jing tơ ring kơ drâm păng jang atŏk tơ iung tơ ring kơ drâm pơ jing tơ drong ‘lơ̆ng vă jang atŏk tơ iung mŭk drăm, tơ pôl, hơ tŏk tơ drong tơ plih ming trong jang mŭk drăm păng hơ met ming trong jang xa kiơ̆ trong jang kơ măy kơ mŏk ‘nao; tơ drong jang tŏk đơ̆ng 1,2 tơ ring kơ drâm jing jơ hngâm pran vă jang atŏk tơ iung mŭk drăm, tơ pôl tơ̆ tơ ring tơ rang...

Mă lei, hơ dai hăm dôm tơ drong ‘lơ̆ng hlôi jang đei kŭm oei đei lơ tơ drong tam mă lăp, ưh kơ ‘lơ̆ng mưh atŏk tơ iung tơ ring kơ drâm ‘năi...Tơ drong ‘nâu athei dôm anih jang kơ pal jăh chă đei trong jang hrơ̆ch ‘lơ̆ng vă atŏk tơ iung tơ ring kơ drâm tih jing jơ hngâm pran vă jang tŏk; tơ chĕng hơ len, tơ lĕch lơ trong tơ gŭm hơ drô̆ lơ̆m tơ drong jang atŏk tơ iung tơ ring kơ drâm.

Dơ̆ng: Tơ blơ̆