VOV4. Băhnar - Kơsơ̆ năr 24/1, Dơnŏ anĭh tơm vei lăng Jŏh ayŏ kpơdŏ soang-Đă ƀŏng lŏng tơplŏng kơdau păng Tơmang pơ hiơ̆ pơgơ̆r “Hop akŏm drơ̆ng mĭnh nơ̆r trong jang, trong plôih ‘măng bơ̆ jang tơmang pơ hiơ̆ apŭng plĕnh tĕh”, kiơ̆ trong pơgơ̆r trư̆k tuyên trŭh 20 hơnĭh pơdăh tơ̆ rim dêh char, pơlei tơm găh Trung ương. Tơ̆ hop akŏm, Dơnŏ anĭh tơm vei lăng Jŏh ayŏ kơdŏ soang-Đă ƀŏng lŏng tơplŏng kơdau păng Tơmang pơ hiơ̆ athei plôih ‘măng sơng hơvơn tơmoi tơmang pơ hiơ̆ đơ̆ng năr 1/5 kơnh. Jô̆ trŭh năr 23/1/2022, Việt Nam hlôi sơng đei 8.500 ‘nu tơmoi tĕh đak đe năm tơmang tơ̆ 3 tơring: Phú Quốc (Kiên Giang), Khánh Hòa, Quảng Nam. Trŭh dang ei, kơsô̆ hơnĭh jang ba tơmang pơ hiơ̆ apŭng plĕnh tĕh, hơnĭh tep pơdơ̆h tơmang pơ hiơ̆ păng hơnĭh chơ ba chĭh hơnăn apĭng sơng tơmoi roi năr roi lơ. Tơ̆ hơnăp dôm tơdrong ƀô̆h ‘lơ̆ng hơ iă kơ ‘măng jang pơlong năng sơng hơvơn tơmoi tĕh đak đe, tơ̆ hop akŏm “Drơ̆ng mĭnh nơ̆r trong jang, trong plôih ‘măng bơ̆ jang tơmang pơ hiơ̆ apŭng plĕnh tĕh”, rim bơngai joăt jang jei lăp đon hăm tơdrong Việt Nam kăl atŏk tĕnh koăng tơdrong plôih ‘măng tơmang pơ hiơ̆ apŭng plĕnh tĕh.

Tơblơ̆ nơ̆r: Amazưt