Ơ đĭ đăng kon pơlei, pơla păng khul linh lơ̆m tĕh đak,

         Mĭnh pơyan Puih mak ‘nao Quý Mão vih truh dơ̆ng tơ̆ tĕh đak Việt Nam tôch ‘mêm kơeng kơ đĭ đăng bơ̆n! Kơplăh jơ năr sơng sơnăm ‘nao tôch sĭt păng tôch hơiă âu, tang măt ăn kơdră chĕp kơ̆l Đảng păng tĕh đak, inh apinh pơtruh nơ̆r ăn đĭ đăng kon pơlei, pơla păng khul linh, tơpôl bơngai Việt Nam bơ̆n oei xa tơ̆ tĕh đak đe jơhngâm đon ‘mêm kơ eng, nơ̆r jet gia pơma nuh păng nơ̆r hmach thơthou ‘lơ̆ng hơiă hlŏh. Inh kŭm apĭnh pơtruh nơ̆r ăn bôl boăl jơ̆p plei tĕh, kon pơlei tơ̆ rim tĕh đak nơ̆r thơthou rơngei hiôk hian, pơm tơbôl, jang hơdoi păng hơnơ̆ng jang tŏk!

        Sơnăm Nhâm Dần - 2022 ‘nao năm hlŏh hăm lơ tơdrong kăl kơ ƀlŏk – mĭnh sơnăm đei lơ tơdrong pơmat tat, pơlong nol tih, ưh ê đei lơ tơdrong ưh hơiă, ƀơm kơnê̆ truh lơ tơdrong păng ƀơm ưh ‘lơ̆ng tôch dêh ưh lăp hăm tĕh đak bơ̆n đĕch mă oei hăm jơ̆p apŭng plenh tĕh hloi. Lơ̆m tơdrong pơmat tat ‘nŏh, đĭ đăng Đảng, đĭ đăng kon pơlei, đĭ đăng khul linh bơ̆n chĕp vei kơjăp jơhngâm đon ‘mêm kơ tĕh đak, đon adrin tôch ai, nuih mơng, tơguăt mĭnh jơhngâm, hơbĕch hơbal, gơ̆h hơgei, adrin jang khŏm iŏk đei lơ tơdrong jơnei tôch gĭt kăl, tôm tơdrong, hăm lơ tơdrong tôch hơiă: Akŏm jơhngâm tang găn, vei lăng tơdrong jĭ hơ buh hai, hơtŏk jơhngâm jang tŏk ming păng tưk tơiung mŭk drăm, tơpôl hai, pơjing tơdrong jang mŭk drăm kơdih hơdai hăm đon kơchăng, adrin mât jang hơdoi hăm apŭng plenh tĕh tôm tơdrong, jrŭ xă păng đei yoa; chĭnh trĭ tơpôl sơđơ̆ng ‘lơ̆ng; tơdrong sơđơ̆ng lơ̆m tĕh đak đei vei kơjăp; vei lăng kơjăp ‘lơ̆ng tơdrong rơngei, sơđơ̆ng vă jang atŏk tơiung tĕh đak; hơmet kơjăp păng pơm hơtŏk đon lui đơ̆ng kon pơlei hăm Đảng, Tĕh đak păng chăl chĕp kơ̆l pơgơ̆r xã hội chủ nghĩa, ‘măn đei lơ tơdrong tôch ‘lơ̆ng hơiă, đei kon pơlei păng bôl boăl lơ̆m apŭng plenh tĕh pơ ư, tơchĕng ‘lơ̆ng, ăn kơ bơ̆n đei dơ̆ng lơ ƀai hŏk kăp gĭt. Tang măt ăn kơdră chĕp kơ̆l Đảng păng Tĕh đak, inh hưch hanh sơmanh bơnê, chơt hơiă, pôk pơ ư păng bơnê kơ đĭ đăng kon pơlei, pơla, păng khul linh lơ̆m tĕh đak găh dôm tơdrong jơnei păng tơdrong tơgop tih tên lơ̆m sơnăm âu ki.

        Mât lơ̆m sơnăm ‘nao Quý Mão - 2023, jĭ sơnăm mă pêng – sơ năm gĭt kăl tơtil hloi, tôch kăp gĭt lơ̆m tơdrong jang kiơ̆ Tơdrong tơchơ̆t đơ̆ng Hop akŏm lơ̆m tĕh đak ‘măng mă XIII kơ Đảng păng trong vă jang atŏk tơiung mŭk drăm tơpôl 5 sơnăm đơ̆ng 2021 - 2025. Hăm đon adrin păng pơhnŏng jang tŏk tôch ai vă tưk tơiung tĕh đak roi đunh roi pơdrŏng, pran kơjăp, hơnŭk hơnoa, hiôk chơt, đĭ đăng Đảng, đĭ đăng kon pơlei, đĭ đăng khul linh bơ̆n athei hơnơ̆ng chĕp vei kơjăp jơhngâm đon 'mêm kơ tĕh đak, tơdrong juăt tơguăt mĭnh ƀơ̆r đon kơjăp 'lơ̆ng, khŏm yak hlŏh rim tơdrong pơmat tat, pơlong nol, jang tŏk tôm tơdrong păng hrơ̆ch 'lơ̆ng hlŏh dơ̆ng tơdrong jang tơplih ‘nao; pơjing păng vei kơjăp Tĕh đak; vei lăng 'lơ̆ng tơdrong rơngei, sơđơ̆ng, bơ̆ jang đei jơnei dôm tơdrong pơhnŏng, tơdrong jang đei tơlĕch, pơih trong păng pơjing jơhngâm pran vă tĕh đak jang tŏk hrĕnh păng kơjăp lơ̆m dôm sơnăm đơ̆ng rŏng dơ̆ng, vang tơgop pơjing tĕh đak 'mêm kơeng kơ đĭ đăng bơ̆n roi đunh roi pơdrŏng, hơnŭk hơnoa, roi đunh roi 'lơ̆ng rŏ hlŏh dơ̆ng.

        Lơ̆m jơhngâm đon chơt hơiă sơng sơnăm ‘nao Quý Mão, mĭnh ‘măng dơ̆ng, inh apinh hmach thơthou ăn đĭ đăng kon pơlei pơla, rim unh hnam, rim răih bơngai Việt Nam mât lơ̆m sơnăm ‘nao pran jăng grăng hơkâu, chơt hơiă ‘nă hal, hiôk jơnap păng jang đei jơnei!

        Hơiă Pơyan Puih mak ‘nao, đon pơhnŏng ‘nao, jơhngâm pran ‘nao, gơ̆h hơgei ‘nao, lơ tơdrong jơnei ‘nao. Rim hnam čhôk ‘nă, rim bơngai hiôk chơt!

        ‘Mêm bơnê!