Đĭ jing tơdrong joăt, rim pơgê, ƀok Pang Ting Sin (bơngai K'Ho) oei tơ̆ phương Lang Biang - Đà Lạt, dêh char Lâm Đồng hơnơ̆ng pơih lăng tơdrong kơtơ̆ng ang lơ̆m điê̆n thoăi hơgei. Ƀok pơih ứng dụng, chă pơih lăng dôm hơnih chih kơtơ̆ng ang kơ Rađiô nơ̆r pơma Việt Nam păng chă truh tơdrong pơre nơ̆r K'Ho. Dôm tơdrong kơtơ̆ng ang đei ƀôh lơ̆m màn hình hăm nơ̆r kơdih kơ hơdrĕch kơdih. Ƀok rơih mĭnh tơdrong kơtơ̆ng ang, đŏk lăng:

“VOV.K’Ho: Khŭl tang măt Đảng Cộng sản Việt Nam yua đơ̆ng ƀok Lê Hồng Quang, Phŏ Kơdră Anih jang Nội chính Trung ương pơm Kơdră khŭl hlôi năm ngôi păng bơ̆jang tơ̆ Brasil”.

Đunh kơ âu 25 sơnăm, Tơdrong pơre nơ̆r K'Ho kơ Rađiô nơ̆r pơma Việt Nam đei pơih pơre. Hơdai hăm pơre nơ̆r joăt joe, dôm tơdrong pơre đei chih tăh lơ̆m website păng lơ̆m dôm mạng tơpôl. Trang Facebook "Nơ̆r K'Ho VOV Tây Nguyên" dang ei đei hloh 9.300 bơngai lăng. Ƀok K' Si Môn -Kơdră Anih jang Mặt trận plei Lộc Bảo, xăh Bảo Lâm 5, dêh char Lâm Đồng tơbăt: dôm tơdrong kơtơ̆ng ang găh tơdrong hơrih, tơdrong jang tơgŭm đơ̆ng Đảng, Teh đak păng dôm tơdrong tơroi joh ayŏ kơdŏ soang đei chih hăm kơtơ̆ng nơ̆r kon kông kơdih lơ̆m dôm kơmăy kơsô̆ kơ Rađiô nơ̆r pơma Việt Nam, tơgŭm kon pơlei mơ̆ng ƀônh, ƀônh kơ hlôh păng ƀônh kơ băt hloh.

“Inh gơh băt hăm tơdrong pơre nơ̆r K'Ho blŭng a ‘noh đơ̆ng Facebook. Đơ̆ng noh inh băt lơ hloh tơdrong kơtơ̆ng ang hăm nơ̆r K'Ho nhôn. Kơdih kâu inh kŭm hơnơ̆ng pơih đŏk păng mơ̆ng dôm tơdrong kơtơ̆ng ang đei tơroi hăm nơ̆r K'Ho, Mạ, yua thoi noh inh mă băt đei lơ hloh dơ̆ng. ‘Meh vă kon pơlei K'Ho, Mạ mơ̆ng vă băt lơ tơdrong kơtơ̆ng ang hăm nơ̆r kon kông kơdih, đơ̆ng noh tơgop lơ̆m tơdrong chĕp vei păng tưk tơiung nơ̆r pơma K'Ho, Mạ roi năr roi hơtŏk tơiung".

Ưh khan lăp hơnhăk tơdrong kơtơ̆ng ang truh hăm kon pơlei, tơdrong tơroi nơ̆r K'Ho kơ Radiô Nơ̆r Pơma VN oei tơgop chĕp vei nơ̆r pơma kơ hơdrĕch kon kông. Ƀok Cil Poh, Phŏ Kơdră Anih vei lăng kon pơlei phương Lang Biang - Đà Lạt, dêh char Lâm Đồng akhan, tơdrong ‘nâu roi đei tơdrong ‘lơ̆ng lơ̆m tơdrong hơrih sa năr ‘nâu, ƀơ̆t 1,2 ‘nu bơngai K'Ho hiơt răh nơ̆r pơma dăh mă ưh kơ gơh chih chư hơdrĕch kơdih.

“Hrei ‘nâu đei mĭnh ƀar 'nu bơngai K'Ho pă gan gơh pơma, gơh chĭh nơ̆r hơdrĕch kơdih. Radio nơ̆r pơma Việt Nam pơih pơre hăm nơ̆r K'Ho 'noh jĭ tơdrong tôch kơ 'lơ̆ng hơiă. Tơroi tơbăt hăm nơ̆r K'Ho tơgŭm kon pơlei hơtŏk 'lơ̆ng đon hlôh vao. Ĭnh 'meh vă Đảng, Teh đak hơnơ̆ng bơngơ̆t truh, hơtŏk loi dơ̆ng pơih pơre hăm nơ̆r K'Ho vă tơgop chĕp vei păng tưk tơiung nơ̆r pơma K'Ho."

Tơ̆ dôm tơring oei lơ mơmat tat, tơdrong hơnhăk tơdrong kơtơ̆ng ang trŏ ƀlep truh hăm kon pơlei hăm nơ̆r kon kông roi đei yoa. Tơ̆ xăh Đam Rông 4, dêh char Lâm Đồng, hlŏh 90% kơsô̆ kon pơlei 'nŏh jĭ bơngai kon kông, đei lơ ‘nŏh jĭ bơngai K'Ho Cil păng M'Nông. Ƀok Lơ Mu Ha Poh, Phŏ Bí thư chĕp kơ̆l pơgơ̆r xăh Đam Rông 4 tơbăt: hăm kon pơlei tơ̆ âu, dôm tơdrong kơtơ̆ng ang găh trong jang, tơdrong tơgŭm đơ̆ng Đảng, Teh đak, găh tơdrong hơrih sa, choh jang sa păng joh ayŏ đei roi tơbăt hăm nơ̆r K'Ho, M'Nông tơgŭm ăn kon pơlei ƀônh hlôh vao ƀiơ̆.

“Radio nơ̆r pơma Việt Nam ling lang bơngơ̆t truh, vang yak hơdai hăm khŭl kơdră đảng, khŭl kơdră tơring. Mă loi, xăh Đam Rông 4 đei lơ kon pơlei bơngai K'Ho Cil păng M'Nông. Radio hlôi tơtom roi tơbăt tơdrong kơ tơring truh hăm kon pơlei, hơdai hăm 'noh roi tơƀôh dôm tơdrong joh ayŏ joăt joe 'lơ̆ng hơiă đơ̆ng kon pơlei kon kông truh hăm kon pơlei lơ̆m teh đak."

Hlŏh 80 sơnăm âu ki, đơ̆ng năr Rađiô nơ̆r pơma Việt Nam pơih nơ̆r pơma mă blŭng, hơyuh pơre đơ̆ng Radio hlôi truh hăm jơ̆p tơring tơrang lơ̆m teh đak. Hăm tơdrong pơre nơ̆r K'Ho yua đơ̆ng Anih bơ̆ jang oei tơ̆ tơring Tây Nguyên bơ̆ jang hlôi đei 25 sơnăm yak hơdai hăm kon pơlei. Păng ƀơ̆t nơ̆r K'Ho đei pơih lơ̆m trong hơyuh pơre nơ̆r kơ teh đak, đei tơmơ̆t lơ̆m kơmăy kơmŏk kơsô̆, tơgop păr ang nơ̆r pơma, tơdrong oei sa joăt joe kơ hơdrĕch hơdrung bơ̆n lơ̆m jơ̆p apŭng plĕnh teh.