VOV4.Bahnar - Jang kiơ̆ khei bơ̆ jang yoa đe hơ iŏh sơ năm 2022, Công ty jang unh điên Dak Nông ‘nao pơ gơ̆r hơ păh 450 tơ pu tơ mam ăn kon mon hơ iŏh tơ̆ plei Bu Rwah, xăh Đak N’Drung (apŭng Đak Song). Mĭnh tơ pu tơ mam đei ƀĕng keo, đak tŏh, hla ar hŏk…

PC Dak Nông hơ nơ̆ng đei lơ tơ drong jang vang tơ gŭm ăn plei Bu Rwah (apŭng Đak Song)

Ƀlep ƀât ‘măng mă âu, Khul druh dăm PC Dak Nông kŭm hăm khul druh dăm tơ ring oei pơ gơ̆r lơ tơ drong ngôi pơ chơt ăn đe ŏh hơ iŏh, nhen pơ gơ̆r hơ ri hơ xoang, ngôi pơ chơt...

Pơ gơ̆r tơ drong ngôi pơ chơt ăn hơ iŏh, hŏk tro

Đei băt plei Bu Rwah jĭ plei pơm pô̆ hăm Công ty jang unh điên Dak Nông. Đơ̆ng lơ sơ năm ‘nâu, công ty hơ nơ̆ng pơ gơ̆r lơ tơ drong jang tơ gŭm ăn dôm unh hnam mơ mat tat, pơ lung đe kon mon lơ̆m pơ lei adrin yak hlŏh mơ mat tat, pơ nam hŏk pơ hrăm păng hŏk mă rơ gei.

Dơ̆ng: Tơ blơ̆