VOV4.Bahnar - Hơ dai hăm bơ ngai jang păng tơ mơ̆t yua kơ măy kơ mŏk kơ sô̆, hơ drin pơm lăp tôm tơ tom ‘meh vă găh ŭnh điên păng dôm tơ drong pơ vih pơ văn đei yua, Kŏng ti jang găh Ŭnh điên Dak Nông hlôi pơm đei tơ drong lui ngeh, ‘lơ̆ng hơ iă hăm tơ moi yua ŭnh điên. Pơm kiơ̆ tĕch mơ dro ‘lơ̆ng hơ iă, kang ƀô̆ bơ ngai jang ŭnh điên Dak Nông ling lang đĭ jơ hngơ̆m hăm tơ drong jang, iŏk tơ moi yua ŭnh điên pơm tơm lơ̆m rim tơ drong jang, pơ jing um rup bơ ngai jang ŭnh điên tơ năp, rơ hâu hăm tơ pôl.

PC Dak Nông asong hnam ‘mêm mơ nat ăn kơ yă Đặng Mùi Quyền, xăh Đăk Wil, apŭng Cư Jút

Hơ dai hăm tơ drong tơ mơ̆t jên jang kơ hrĕng ti hlak jên vă tơ lĕch dôm tơ drong jang hơ nhăk ŭnh điên vih tơ̆ tơ ring hơ tăih hơ tŏ, PC Dak Nông oei jang kiơ̆ lơ tơ drong jang vei lăng sơ đơ̆ng tơ drong arih sa tơ pôl, tơ gop hơ tŏk ‘lơ̆ng tơ drong arih sa kon pơ lei. Jô̆ păh lăp rim sơ năm, kŏng ti bơ̆ jang kiơ̆ dôm tơ drong jang ming man hnam ‘mêm mơ nat; asong tơ mam ăn dôm ŭnh hnam teh đak tơ gŭm, bơ ngai dơ nuh hin mưh năr lêh, têt; pơ jao hŏk ƀŏng ăn hŏk tro dơ nuh hin; tơ gŭm jên ăn gŏ sŏng sa ‘mêm mơ nat tơ̆ dôm hnam pơ gang lơ̆m dêh char Dak Nông...hăm akŏp jên dang 500 triệu hlak jên.

VOV Tây Nguyên- Thuem: Tơ blơ̆