VOV4.Bahnar - Kơ sơ̆ ‘năr 7/4, Bơ ngai jang lơ̆m Anih chĕp kơ̆l pơ gơ̆r Trung ương Đảng, Phŏ Kơ dră teh đak Võ Thị Ánh Xuân kŭm hăm khŭl bơ̆ jang hlôi năm tơ mang păng asong tơ mam ăn kơ dôm ŭnh hnam teh đak tơ gŭm tơ̆ apŭng Lạc Dương, dêh char Lâm Đồng.

Phŏ Kơ dră teh đak Võ Thị Ánh Xuân pơ jao asong 30 tơ pu tơ mam ăn kơ dôm ŭnh hnam teh đak tơ gŭm tơ̆ apŭng Lạc Dương

Đơ̆ng rŏng kơ mơ̆ng tơ roi tơ băt găh tơ drong hơ tŏk tơ iung mŭk drăm - tơ pôl kơ tơ ring, Phŏ Kơ dră teh đak Võ Thị Ánh Xuân hlôi chih iŏk păng lăng ‘lơ̆ng dôm jơ nei mă apŭng Lạc Dương hlôi iŏk đei lơ̆m khei ‘năr âu ki, ‘meh vă Lạc Dương hơ nơ̆ng hơ tŏk dôm tơ mam ‘lơ̆ng, tơ drong pran đei đơ̆ng hơ drol kơ đe sư, jang kiơ̆ đei jơ nei tơ drong jang tơ plih hơ met ‘long pơ tăm, tơ mơ̆t yua kơ măy kơ mŏk ‘nao lơ̆m choh jang sa, hơ tŏk ‘lơ̆ng păng kơ jă tơ mam choh jang sa lơ̆m 1 hơ nih teh choh pơ tăm.

Pơ jao asong 10 tŏ hnam ‘mêm mơ nat ăn kơ apŭng Lạc Dương, dêh char Lâm Đồng

‘Măng âu, Phŏ kơ dră teh đak hlôi pơ jao asong 30 tơ pu tơ mam ăn kơ dôm ŭnh hnam teh đak tơ gŭm, pơ jao asong 10 tŏ hnam ‘mêm mơ nat ăn kơ apŭng Lạc Dương. Phŏ Kơ dră teh đak Võ Thị Ánh Xuân kŭm năm tơ mang 1,2 tơ drong jang pơm tơ lĕch hăm kơ măy kơ mŏk ‘nao tơ̆ thị trấn Lạc Dương, apŭng Lạc Dương, dêh char Lâm Đồng.

Thuem: Tơ blơ̆