VOV4.Bahnar - Phŏ Kơ dră tĕh đak Võ Thị Ánh Xuân truh plang pơ kao, sŏh hlôt nhang ƀlŏk hơ dơ̆r kơ Ƀok Hô tơ̆ Anih gru groa gĭt kăl kơ tĕh đak Kim Liên, apŭng Nam Đàn, dêh char Nghệ An.

Hăm ƀĕnh jơ hngâm đon lui yom, Phŏ Kơ dră tĕh đak Võ Thị Ánh Xuân kŭm hăm khul jang hlôi plang pơ yơ̆r pơ kao, sŏh nhang, ƀlŏk hơ dơ̆r, tơ ƀôh jơ hngâm đon ‘mêm bơ nê, kŭp yom tôch ai hăm Ƀok Hô – kơ dră chĕp kơ̆l tôch rơ gei kơ Đảng păng kon pơ lei bơ̆n, Bơ ngai tơ blăh kơ tang iŏk rơ ngei ăn hơ drĕch hơ drung, bơ ngai chih pơ đơ̆k tôch rơ gei, Bơ ngai hlôi plang đĭ jơ hnơr arih ăn tơ drong jang tơ blăh iŏk rơ ngei hơ drĕch hơ drung, khul bơ ngai jang, yoa tơ drong rơ ngei păng hiôk chơt kơ hơ drĕch hơ drung Việt Nam păng kon pơ lei lơ̆m apŭng plenh tĕh.

Chih lơ̆m kơ sơ̆p hla ar kăp gĭt tơ̆ Anih Gru groa Kim Liên, Phŏ Kơ dră tĕh đak Võ Thị Anh Xuân chih: “Lui yom păng ƀlŏk bơ nê kơ Ƀok, nhôn kon mon đĭ jơ hnơr vă hŏk pơ hrăm kiơ̆ đon tơ chĕng, jơ hngâm đon, trong bơ̆ jang đơ̆ng Ƀok Hô; akŏm kơ sư̆k, mĭnh jơ hngâm pơ jing Đảng bơ̆n rơ gŏh ‘lơ̆ng, pran kơ jăp, vang tơ gop tơ iung pơ jing tĕh đak roi đunh roi pơ drŏng ‘lơ̆ng rŏ, gơ̆h rơ gei; Kon pơ lei hiôk chơt”.

Dơ̆ng: Tơ blơ̆