VOV4.Bahnar - ‘Năr (18/8), Kơ dră jang lơ̆m Trung ương Đảng, Phŏ Kơ dră tĕh đak Võ Thị Ánh Xuân kŭm hăm khul jang năm hơ pong păng bơ̆ jang tơ̆ Kơ đông linh vei lăng tơ ring sơ lam Srêpôk, Dơ nŏ anih vei lăng kon pơ lei apŭng Buôn Đôn păng Trung đoàn Kanh sat Cơ động Tây Nguyên tơ̆ dêh char Dak Lak. 

Phŏ Kơ dră tĕh đak Võ Thị Ánh Xuân bŏ jang hăm apŭng Buôn Đôn, dêh char Dak Lak

Năm ngôi, dăr lăng, pơ lung đe kăn ƀô̆ tơ̆ kơ đông linh vei lăng tơ ring sơ lam Srêpôk, Phŏ Kơ dră tĕh đak Võ Thị Ánh Xuân pôk pơ ư păng tơ chĕng ‘lơ̆ng tơ drong mât 1 ƀơ̆r đon, khŏm yak hlŏh mơ mat tat, jang đang ‘lơ̆ng tơ drong jang đei pơ jao đơ̆ng đe kăn ƀô̆, linh tơ̆ tơ ring sơ lam Dak Lak, dêh char đei anih dơ̆ng tôch gĭt kăl găh tơ drong sơ đơ̆ng tĕh đak, mă loi ‘nŏh lơ̆m tơ ring Nguyên, jô̆ hloi jơ̆p lơ̆m tĕh đak.

Bơ̆ jang hăm kơ dră chĕp kơ̆l apŭng Buôn Đôn, Phŏ Kơ dră tĕh đak tơ tă, kơ sô̆ unh hnam tơ nuh tơ̆ apŭng oei lơ, iŏk đei hlŏh 37%. ‘Nâu jĭ tơ drong kơ hret tih hăm tơ ring mưh bơ̆ jang vei sơ đơ̆ng tơ drong arih xa tơ pôl, jang tŏk pran kơ jăp… Phŏ Kơ dră tĕh đak athei apŭng Buôn Đôn pơ ma adrô̆ păng Dak Lak pơ ma atŭm tơ rĕk hlŏh dơ̆ng truh tơ drong jang sut pơ đĭ pơ ngot, tơ jur tơ nuh hin, tơ gĕch iŏk dôm tơ drong ‘lơ̆ng tơ̆ tơ ring.

Dơ̆ng: Tơ blơ̆