VOV4.Bahnar - Kơ sơ̆ 1/4, Phŏ Kơ dră tĕh đak Võ Thị Ánh Xuân truh hơ pong păng bơ̆ jang hăm kăn bô̆, linh tơ̆ Kơ đông linh vei lăng tơ ring sơ lam Gành Dầu tơ̆ plei Gành Dầu, xăh Gành Dầu, plt Phú Quốc, dêh char Kiên Giang. Kơ đông linh Gành Dầu vei lăng jih đak dơ sĭ kơ jung truh 33km. Tơ̆ tơ ring đak dơ sĭ sư vei lăng đei 3 tŏ kông ‘nŏh Kông Hòn Bàng, Kông Hòn Thầy Bói, Kông Hòn Móng Tay. 

Phŏ Kơ dră tĕh đak Võ Thị Ánh Xuân bơ̆ jang tơ̆ Kơ đông linh Gành Dầu

Lơ̆m sơ năm 2021, kơ đông linh Gành Dầu yak hlŏh rim tơ drong mơ mat tat, vă jang đang ‘lơ̆ng 2 tơ drong jang tơm, tang găn jĭ, tang găn dôm tơ drong yoch hai, krao hơ vơn kon pơ lei jang ka tơ̆ đak dơ sĭ pơm kiơ̆ ‘lơ̆ng dôm tơ drong hơ găt đơ̆ng luơ̆t, vei lăng đak dơ sĭ, achon kông tơ̆ đak dơ sĭ hai...  

Phŏ Kơ dră tĕh đak tơ chĕng ‘lơ̆ng păng tôch pơ ư tơ drong tơ guăt 1 jơ hngâm, adrin yak hlŏh mơ mat tat, jang đang tơ drong jang đei pơ jao đơ̆ng đe kăn ƀô̆, linh tơ̆ Kơ đông Gành Dầu. Atŭm hăm ‘nŏh athei kơ đông tơ rĕk truh tơ drong pơ jing đảng vă jang ‘lơ̆ng tơ drong jang chinh trĭ, đon tơ chĕng păng vei lăng kăn ƀô̆; pơ jing khul linh pran kơ tang tôm tơ drong, mă loi jĭ khul kăn ƀô̆ chĕp kơ̆l gơ̆h hơ gei hai, đei đon jang chinh trĭ kơ jăp ‘lơ̆ng hai.  

Dơ̆ng: Tơ blơ̆