VOV4.Bahnar - Gơ măng ‘năr 8/9, Phŏ Kơ dră teh đak, Kơ dră Jơ nŭm Anih mong jên tơ gŭm hơ ioh Việt Nam Võ Thị Ánh Xuân kŭm hăm Khŭl bơ̆ jang kơ Trung ương hlôi vang năm akŏm Gơ măng rang khei pơ nil păng asong tơ mam ăn hŏk tro Hnam trưng teh đak teh rong ‘me hŏk tro kon kông hŏk jăl 2 apŭng Văn Yên, dêh char Yên Bái kŭm hăm bơ ngai tang măt đe oh đei tơ drong arih sa mơ mat tat, hŏk tro jo jăn lơ̆m apŭng, vang akŏm dôm tơ drong pơ chơt Tết Trung thu nhen năm lăng “tơ drong joh ayŏ sơ năm ‘lơ̆p”, lăng hơ soang yă  grai...

Phŏ Kơ dră teh đak Võ Thị Ánh Xuân păng kơ dră chĕp kơ̆l dêh char Yên Bái asong tơ mam ăn đe mon hơ ioh

Ƀlep ƀơ̆t Tết Trung thu sơ năm 2022, Phŏ Kơ dră teh đak Võ Thị Ánh Xuân hlôi asong 400 triệu hlak jên ăn hơ ioh đei tơ drong arih sa mơ mat tat kơ dêh char Yên Bái; asong 20 kơ suơ̆t hŏk ƀŏng ăn kơ hŏk tro Hnam trưng teh đak rong ‘me hŏk tro kon kông hŏk jăl 2 apŭng Văn Yên. Anih mong jên tơ gŭm hơ ioh Việt Nam pơ jao asong 100 kơ suơ̆t hŏk ƀŏng kŭm hăm 30 tong gre tang vang ăn kơ hŏk tro hnam trưng.

Phŏ Kơ dră teh đak Võ Thị Ánh Xuân vang pơ chơt hăm đe mon hơ ioh

Khŭl vei lăng bơ ngai jo jăn păng hơ ioh mơ ti Việt Nam asong tơ mam ăn kơ 50 ‘nu hŏk tro. Anih mong jên hơ ioh dêh char pơ jao 20 tơ pu tơ mam ăn kơ hŏk tro đei tơ drong arih sa mơ mat tat, hŏk tro jo jăn lơ̆m apŭng.

Thuem: Tơ blơ̆