VOV4.Bahnar - Hơ nơ̆ng năm hơ pong ngôi tơ̆ tĕh đak Croatia, Phŏ Kơ dră tĕh đak bơ̆n yă Võ Thị Ánh Xuân hlôi pơ ma nuh hăm Kơ dră tơm Croatia Zoran Milanović.

Kơ dră tơm Croatia sơng Phŏ Kơ dră tĕh đak bơ̆n yă Võ Thị Ánh Xuân

Tơ̆ jơ pơ ma nuh, Phŏ Kơ dră tĕh đak Võ Thị Ánh Xuân tơ ƀôh đon hơ iă păng bơ nê kơ ƀok Kơ dră tơm tĕh đak Croatia ‘măn jơ sơng khul, pơ ma hơ dăh Việt Nam ling lang năng kăl păng hơ pơi ‘mĕh pơm hơ tŏk tơ drong pơ vei jang tơ bôl ‘lơ̆ng hơ iă păng jang hơ doi đơ̆ng sơ̆ lơ̆m rim tơ drong đơ̆ng 2 tĕh đak đei pơ jing dôm jĭt sơ năm âu ki, ƀât Croatia oei găh tĕh đak Liên bang Nam Tư sơ̆.

Ƀar ‘nu kơ dră chĕp kơ̆l drơ̆ng nơ̆r kăl hơ tŏk tơ drong pơ gơ̆r ăn khul chă tơ ƀâp, pơ ma nuh hăm băl, mă loi hăm khul jang kơ pal, atŭm hăm ‘nŏh drơ̆ng nơ̆r hăm 1,2 trong jang vă pơm hơ tŏk tơ drong pơ vei 2 pang, mă loi găh mŭk drăm – tĕch mơ dro – tơ mât jên jang kŭm nhen pơih xă tơ drong jang hơ doi truh 1,2 tơ drong ‘lơ̆ng nai nhen găh chă tơ mang lăng, chơ chuĕn, pơ tho pơ hrăm, tơ plŏng kơ dâu.

VOV/Dơ̆ng tơ blơ̆