Sơng iŏk nơ̆r krao đơ̆ng Phŏ Kơ dră tĕh đak Võ Thị Ánh Xuân, Kon ƀok pơ tao Đan Mạch Frederik păng hơ kăn ƀok Mary Elizabeth năm hơ pong tơ̆ Việt Nam đơ̆ng ‘năr 31/10 - 3/11. Pơ gê 1/11, đơ̆ng rŏng kơ lêh sơng tơ̆ Anih jang kơ ƀok Kơ dră tĕh đak, Phŏ Kơ dră tĕh đak bơ̆n yă Võ Thị Ánh Xuân hlôi pơ ma nuh hăm Kon ƀok pơ tao tĕh đak Đan Mạch.  

Phŏ Kơ dră tĕh đak Võ Thị Ánh Xuân sơng pơ ma nuh hăm Kon ƀok pơ tao Frederik

Phŏ Kơ dră tĕh đak Võ Thị Ánh Xuân hơ iă tơ̆ hơ năp tơ drong pơ vei, jang hơ doi lơ tơ drong đơ̆ng 2 tĕh đak oei tŏk pran ‘lơ̆ng lơ̆m rim tơ drong, mă loi găh tơ mât jên jang, jang hơ doi găh unh hơ yuh, cham char păng bơ̆ jang, arih xa ‘moi kiơ̆ tŏ ‘mi kial tơ plih, pơ tho pơ hrăm, joh ayŏ kơ dŏ xoang,... Phŏ Kơ dră tĕh đak Võ Thị Ánh Xuân hơ pơi ‘mĕh roi đunh roi đei lơ anih jang xa đơ̆ng Đan Mạch truh tơ mât jên jang, tĕch mơ dro roi đei yoa tơ̆ Việt Nam lơ̆m rim tơ drong mă Đan Mạch jang gơ̆h păng Việt Nam oei kăl.