VOV4.Bahnar - Pơ gê ‘năr 26/7, tơ̆ Anih jang Kơ dră teh đak, Phŏ kơ dră teh đak Võ Thị Ánh Xuân sơng Khŭl tang măt bơ ngai đei kŏng dêh char Bình Định ƀlep ƀơ̆t khŭl năm tơ mang tơ̆ Anih tơm Hà Nội păng mơ̆t hơ pong tơ̆ pơ sat ƀok Hồ. Dêh char Bình Định dang ei đei 180 rơ bâu ‘nu bơ ngai teh đak tơ gŭm, lơ̆m noh đei 32 rơ bâu ‘nu lĭnh lôch dŏng teh đak, hloh 26 rơ bâu ‘nu lĭnh jĭ rơ ka. Dêh char Bình Định dang ei tŏk bŏk bơ̆ jang kiơ̆ tơ lĕch kla jên tơ gŭm hơ nơ̆ng rim khei ăn hloh 33 rơ bâu ‘nu bơ ngai đei kŏng hăm kach mang păng ŭnh hnam bơ ngai đei kŏng. Pơ ma tơ̆ jơ sơng, Phŏ kơ dră teh đak Võ Thị Ánh Xuân gơ̆ih nơ̆r apĭnh jet gia păng tơ drong ‘mêm ‘lơ̆ng hơ iă truh bơ ngai tang măt bơ ngai đei kŏng hăm kach mang dêh char Bình Định; athei dêh char Bình Định pôk pơ ư dôm bơ ngai đei kŏng hơ gei vă băt bơ nê hăm bơ ngai đei kŏng; dăr hơ len dơ̆ng tơ drong jang bơ ngai đei kŏng lơ̆m tơ ring dang ei; hơ vơn dôm kon jên đơ̆ng tơ pôl ‘ngoăih kơ teh đak vă vei lăng, vei sơ đơ̆ng dôm trong jang tơ gŭm tơ tom, ƀlep, hơ tŏ hơ nơ̆ng hăm bơ ngai đei kŏng.

 Thuem: Tơ blơ̆