VOV4.Bahnar - ‘Năr 7/6, tơ̆ Anih jang kơ ƀok Kơ dră tĕh đak, Phŏ Kơ dră tĕh đak Võ Thị Ánh Xuân sơng khul tang măt ăn bơ ngai đei kŏng dêh char Đồng Nai ƀlep ƀât Khul năm tơ̆ Hà Nội păng mât lăng lơ̆m Pơ sat Ƀok Hô. Dêh char Đồng Nai dang ei đei hlŏh 52 rơ bâu ‘nu bơ ngai đei kŏng păng kơ tum kơ tŏng ‘nhŏng ŏh bơ ngai đei kŏng. Lơ̆m nŏh đei 1.141 ‘nu Mĕ Việt Nam nuih mơng.

Pơ ma nuh hăm Khul tang măt bơ ngai đei kŏng hăm kăch mang dêh char Đồng Nai, Phŏ Kơ dră tĕh đak Võ Thị Ánh Xuân pôk pơ ư dôm tơ drong adrin đơ̆ng dêh char Đồng Nai lơ̆m tơ drong jang kiơ̆ trong tơ gŭm ăn bơ ngai đei kŏng; athei dêh char Đồng Nai hơ nơ̆ng tơ lĕch trong krao hơ vơn tơ pôl vang tơ gŭm ăn bơ ngai đei kŏng pơm hơ tŏk tơ drong arih xa găh tơ mam drăm păng jơ hngâm đon; mă loi lơ̆m dôm tơ drong jang ming man, pơm hơ met hnam.

Phŏ Kơ dră tĕh đak kŭm ‘mĕh vă bơ ngai đei kŏng hăm kăch mang dêh char Đồng Nai hơ nơ̆ng pơm hơ tŏk jơ hngâm đon ‘mêm kơ tĕh đak, vang tơ roi tơ băt ăn kon pơ lei tơ̆ dêh char pơm kiơ̆ ‘lơ̆ng dôm trong jang đơ̆ng Đảng, khôi luơ̆t tĕh đak, pơ jing pơ lei pơ la roi đunh roi rơ gei, đei ƀôh păng ‘lơ̆ng rŏ.

Dơ̆ng: Tơ blơ̆