VOV4.Bahnar - Pơ gê ‘năr 21/7, Phŏ kơ dră teh đak Võ Thị Ánh Xuân hlôi truh jơ tơ ƀơ̆p muh măt drŏ kăn kach mang đei ayăt rôp phak khei ‘năr tơ blăh Mi sơ̆ ƀlep ƀơ̆t tơ băt 75 sơ năm Năr lĭnh jĭ rơ ka, lĭnh lôch dŏng teh đak tơ̆ pơ lei tơm Hồ Chí Minh. Lơ̆m 200 ‘nu bơ ngai tang măt ăn hloh 600 ‘nu lĭnh kach mang kơ pơ lei tơm Hồ Chí Minh, mă đơ̆ng đei bơ ngai sơ năm đĭ kră mă lei oei hơ nơ̆ng jing dôm kon pơ lei pơm jŭk yŭk trong hơ lâu, plang jơ hngơ̆m pơ jing ăn pơ lei tơm, teh đak. ‘Nâu kŭm jing jơ tơ ƀơ̆p muh măt ‘măng mă blŭng đơ̆ng dôm đe drŏ kăn kach mang đei ayăt rôp phak lơ̆m khei ‘năr tơ blăh Mi sơ̆. Pơ ma tơ̆ jơ ƀơ̆p muh măt, Phŏ Kơ dră teh đak Võ Thị Ánh Xuân tang măt kơ dră Đảng, teh đak tơ ƀôh jơ hngơ̆m băt bơ nê tơ̆ hơ năp dôm tơ drong hŭt hơ kâu tih tên đơ̆ng đe mĕ, đe duch, đe nă, đe mŏ đei ayăt rôp phak lơ̆m khei ‘năr tơ blăh sơ̆ - pơ ma hơ dăh, rim kang ƀô̆, đảng viên năr ‘nâu athei pơ hrăm jơ hngơ̆m đon ‘lơ̆ng, kĕ jang, đon nuih nhen dôm khŭl linh kach mang sơ̆, hơ nhăk teh đak hơ tŏk tơ iung hrĕnh păng kơ jăp, ƀlŏk hơ dơ̆r kơ jơ hnơr năm hơ drol hlôi plang jơ hngơ̆m ăn tơ drong rơ ngei kơ teh đak.

Thuem: Tơ blơ̆