Tơ̆ jơ sơng, Phŏ Kơdră Đặng Hoàng Giang pơma hơdăh Việt Nam, hăm hơnăp jang vei lăng tơdrong pơvei ASEAN - Anh jăl jang 2024 - 2027, gô hơnơ̆ng jang hơdai kơjăp hăm păh Anh vă chă trong pơvei ASEAN - Anh hơtŏk tơiung pran kơtang, tôm tong, đunh đai păng gĭt kăl, lăp hăm ‘meh vă jang hơdai đơ̆ng 2 păh păng pơm lăp hăm ‘meh vă đơ̆ng tơdrong ‘nao.

Việt Nam kŭm tŏk bŏk hơdrin vei lăng, pơtrŭt pơjing Trong tơlĕch jang Tơdrong jang ASEAN - Anh jăl jang 2027 - 2031, akŏm lơ̆m rim tơdrong jang hơdai tơgŭm hơdrol mŭk drăm, jên hu, tơplih rơgoh, hơtŏk tơiung kơjăp, tơjră hăm tơplih tŏ ‘mi kial, tơplih ‘nao hơgei, jang hơdai đak dơsĭ... Găh tơdrong pơvei 2 pang, Phŏ kơdră Đặng Hoàng Giang lăng ‘lơ̆ng tơdrong tơgŭm đơ̆ng Anh ‘măn ăn kơ Việt Nam lơ̆m tơdrong pơjing Hơnih jang mŭk drăm apŭng plĕnh teh, pơtrŭt jang hơdai lơ̆m rim tơdrong jang; athei Anh hơdrin vang tơroi tơdrong hlôh vao găh tơplih ŭnh hơyuh rơgoh.