Đei tơ-iung pơjing đơ̆ng khei 7/1951, hnam pơgang dang ei jĭ hơnih jang pơgang hơmet jĭ jăn kăp gĭt oei lơ̆m Hơnih tơm Pơgang, đei sơnong jang tơm lơ̆m tơdrong vei lăng jơhngơ̆m jăn ăn kon pơlei lơ̆m tơring tơmăn păng tơring groi kông gah tu. Pôk bơnê kơ dôm tơdrong jang đei jơnei đơ̆ng hnam pơgang lơ̆m hloh 70 sơnăm đei pơjing păng hơtŏk, Phŏ Kơdră Kuô̆k hô̆i pơgơ̆r hăm jơnŭm jang kơdră, khul thâi pơgang pơtoi iŏk yua tơdrong tơguăt tơguăl juăt jue, tơplih 'nao gơh hơgei, hơtŏk kơtang tơdrong chih akŏm păng iŏk yua khua hŏk kih thuơ̆t 'nao rơgei.

Atŭm hăm noh, hnam pơgang kăl hơtŏk tơplih kơmăi kơsô̆ lơ̆m vei lăng, khăm hơmet jĭ, hơtŏk pơ-'lơ̆ng tơdrong jang pơgang hơmet jĭ jăn, iŏk bơngai jĭ pơm tơm. Phŏ Kơdră Kuô̆k hô̆i adoi ră hơdah sơnong jang pơtho pơhrăm kih thuơ̆t ăn tơring, vă tơjur ƀiơ̆ tơdrong hrăt hrot ăn hnam pơgang trung ương, atŭm hăm noh brư̆ brư̆ pơjing hnam pơgang jing hơnih jang pơgang tơm dơnơm, gơh hơgei tơ̆ tơring gah tu, vei lăng năng tông păng hơtŏk 'lơ̆ng jơhngơ̆m jăn ăn kon pơlei.