Tơ̆ jơ tơƀơ̆p pơma dơnuh, Khŭl tang măt Kuôk hô̆i dêh char Hậu Giang hlôi tơroi tơbăt tơchĕng hơdrol tơdrong jang ‘Măng hop akŏm mă 5, Kuôk hô̆i jăl XV; tơdrong tơ̆l nơ̆r tơgop, apĭnh đơ̆ng bơngai tăh hla. Đơ̆ng rŏng ‘noh, lơ bơngai tăh hla pơma nơ̆r tơgop pơtruh jơhngơ̆m đon tơchĕng, ‘meh vă, dôm tơdrong ưh kơ hơiă tơ̆ tơring truh bơngai tang măt Kuôk hô̆i. Pơma tơ̆ jơ tơƀơ̆p, Phŏ Kơdră Kuôk hô̆i Trần Thanh Mẫn, tơƀôh tơdrong chhôk hơiă ƀơ̆t dêh char Hậu Giang đei hơyak hơtŏk tơiung ‘lơ̆ng lơ̆m jăl khei mă I sơnăm ‘nâu, ƀơ̆t mŭk drăm tŏk đei 12,67%, chông hơdrol lơ̆m teh đak.

Tơ̆ hơnăp kơnh, Phŏ Kơdră Kuôk hô̆i Trần Thanh Mẫn athei Hậu Giang hơdrin tơlĕch jang kiơ̆ Tơdrong tơchơ̆t Hop akŏm XIII đơ̆ng Đảng, tơdrong tơchơ̆t Hop akŏm Đảng bộ dêh char Hậu Giang ‘măng mă XIV; kăl kơ bơngơ̆t truh pơtho pơhrăm hơtŏk tơiung bơngai jang vă pơyua ăn tơdrong hơtŏk tơiung tơring; pơjing khŭl jang chĭnh trĭ rơgoh, pran kơjăp pơm lăp hăm ‘meh vă hơnăp jang lơ̆m tơdrong ‘nao.