Bơ̆ jang kiơ̆ nơ̆r tơchơ̆t kơsô̆ 24 đơ̆ng Anih tơm Chinh trĭ găh tơdrong hơnơ̆ng tơchă, sir akŏm, chih vih kơting linh lôch tang ăn teh đak, Khul hlôi tơgŭm tơchă kiơ̆ trong set hơlen, chih tơbăt kơ ting linh lôch tang teh đak oei tam mă set hơlen AND, pơdreu dơ̆ng hơnăn ăn 1.250 ‘nu linh lôch tang teh đak. Tơgŭm chơ chuĕn hlŏh 1.600 kơ̆l linh lôch tang ăn teh đak đơ̆ng Pơsat linh vih ƀŭ hơmet tơ̆ pơlei pơla đe sư.

Pơma tơ̆ jơ bơ̆ jang, Phŏ Kơdră Quốc hội, Thượng tướng Trần Quang Phương ăn tơbăt, vei lăng năng tông bơngai đei kŏng pơma atŭm păng kơtum kơtŏng ‘nhŏng oh, unh hnam linh lôch tang ăn teh đak pơma hơdrô̆, ưh kơsĭ jĭ jơhngâm đon ‘mêm mơnat, băt ƀlŏk hơdơ̆r đĕch mă oei jing tơdrong tơguăt jơhngâm, hơtŏk đon tơchĕng ‘lơ̆ng, chĕp kơ̆l pơgơ̆r kơdih đơ̆ng hơdrĕch hơdrung lơ̆m chăl ‘nao, ‘nŏh jĭ jơhngâm pran ăn teh đak. Hăm tơdrong jang tŏk đơ̆ng kơmăy sô̆, đơ̆ng rŏng kơ pơjing Anih mong gene linh lôch tang teh đak, Phŏ Kơdră Quốc hội hơmĕng gô chă đei dơ̆ng lơ linh lôch tang ăn teh đak tơ̆ hơnăp kơnh.