Phŏ Kơdră teh đak Võ Thị Ánh Xuân, Phŏ Kơdră mă mônh Jơnŭm pơlong pơjei - pôk hơpăh Trung ương vang truh pơm lêh tơbăt. Lơ̆m 15 sơnăm âu ki, Kŏng ti tơm ŭnh điên Đak dâu Việt Nam hlôi ưh kơ đei pơdơh hơtŏk tơiung tih pran păng jing anih jang pơm tơlĕch ŭnh điên tih mă 2 tơ̆ Việt Nam, đơ̆ng rŏng Grŭp jang Ŭnh điên Việt Nam. Truh dang ei, Kŏng ti tơm Ŭnh điên Đak dâu Việt Nam hlôi iŏk vei 7 hnam kơmăy ŭnh điên hăm akŏp kŏng suơ̆t iŏk đei 4 rơbâu 209 MW.

Tơdrong jang akŏp mŭk drăm tŏk 12 ‘măng, iŏk đei 56 rơbâu 502 ti hlak jên pơtêng hăm 4 rơbâu 779 ti hlak jên tơ̆ khei ‘năr pơjing sơnăm 2007. Tơ̆ jơ pơm lêh, tang măt kơdră chĕp kơ̆l Đảng, Teh đak, Phŏ kơdră teh đak pơjao Mê đai bơ̆ jang dơ̆ng mă 2 ăn Kŏng ti tơm ŭnh điên Đak dâu Việt Nam hlôi đei jơnei ‘lơ̆ng hloh lơ̆m tơdrong jang đơ̆ng sơnăm 2017 truh sơnăm 2021, tơgop lơ̆m tơdrong jang pơjing chủ nghĩa xã hội lơ̆m vei lăng Teh đak.