Hlŏh 19 sơnăm pơgơ̆r hơpăh Tơmam hlôi sơng đei lơ bơngai jang khoa hŏk oei mơlôh kơ Việt Nam lơ̆m tĕh đak păng tơ̆ tĕh đak đe chih măt vang akŏm. Truh dang ei, đĭ đei 194 ‘nu bơngai rơgei iŏk đei tơmam hơpăh găh Khoa hŏk kơmăy kơmŏk. Hơdrô̆ tơmam hơpăh Hŏk tro drŏkăn rơgei găh khoa hŏk kơmăy kơmŏk Việt Nam truh dang ei đĭ đei 719 ‘nu hŏk tro drŏkăn iŏk đei tơmam hơpăh âu. 

Pơma lơ̆m jơ tơƀâp, Phŏ Kơdră tĕh đak Võ Thị Ánh Xuân tôch hơiă, chih răk dôm tơdrong tơgop đơ̆ng 30 ‘nu bơngai mơlôh rơgei đei pôk hơpăh tơmam ‘măng mă âu. Phŏ Kơdră tĕh đak akhan, đe bôl boăl mơlôh iŏk đei lơ tơdrong jơnei blŭng a tôch kăp gĭt mă lei athei băt hơdăh tơ̆ hơnăp kơnh oei đei lơ tơdrong mơmat tat ‘năi; athei Trung ương Đoàn hơnơ̆ng tưk tơiung, hơtŏk hlŏh dơ̆ng tơdrong kăp gĭt đơ̆ng tơmam hơpăh vă gơ̆h jing tơmam hơpăh kăp gĭt hlŏh hăm druh dăm Việt Nam găh khoa hŏk kơmăy kơmŏk.