Phŏ Kơdră tĕh đak Võ Thị Ánh Xuân truh akŏm păng iung pơma lơ̆m jơ tơƀâp. Pơma tơ̆ âu, tang măt ăn kơdră chĕp kơ̆l Đảng, tĕh đak păng kon pơlei Việt Nam, Phŏ Kơdră tĕh đak Võ Thị Ánh Xuân pơma hơdăh, sơnăm 2023 đei lơ tơdrong tôch gĭt kăl hăm Việt Nam, jĭ sơnăm gĭt kăl hơnơ̆ng jang kiơ̆ dơ̆ng trong jang atŏk tơ iung mŭk drăm, tơpôl 5 năm 2021-2025.

Việt Nam hơnơ̆ng pơ ‘nhŏ ăn tơdrong tang găn ‘lơ̆ng tơdrong jĭ, vei kơjăp mŭk drăm lơ̆m tĕh đak, tưk tơiung tơdrong jang tŏk. Hơtŏk tơdrong tơplih ‘nao, jang hăm kơmăy sô̆, jang tŏk rơgŏh ‘lơ̆ng, vei lăng ‘lơ̆ng cham char, tơjră hăm tŏ ‘mi kial tơplih.

Phŏ Kơdră tĕh đak lui, kiơ̆ đơ̆ng tơdrong pơvei ‘lơ̆ng hơiă lơ̆m lơ sơnăm âu ki, dôm anih tang măt jang tơbôl, dôm anih jang lơ̆m apŭng plenh tĕh păng dôm anih jang lơ̆m tơpôl đơ̆ng tĕh đak đe hơnơ̆ng jang hơdoi kơ jăp hăm Việt Nam, yoa tơdrong jang tŏk kơjăp ‘lơ̆ng, hơnŭk hơnoa, hiôk chơt đơ̆ng Việt Nam, kŭm nhen đĭ đăng tĕh đak, rim hơdrĕch hơdrung lơ̆m apŭng plenh tĕh.