Tang măt kơdră chĕp kơ̆l Teh đak păng Jơnŭm Pơjei băl Pôk hơpăh kơ Trung ương, Phŏ Kơdră teh đak Võ Thị Ánh Xuân pôk pơ ư, hmach chơt hơiă dôm jơnei gĭt kăl đơ̆ng Đảng bộ, khŭl kơdră păng Kon pơlei dêh char Thanh Hóa hlôi iŏk đei lơ̆m jăl jang âu ki. Hơdai hăm pơma hơdăh, dêh char Thanh Hóa tŏk bŏk dơ̆ng tơ̆ hơnăp tơdrong hiôk tih vă jing dêh char dơ̆ng hơdrol, dêh char ‘lơ̆ng kơ lơ̆m teh đak, yak truh dêh char pơdrŏng ‘lơ̆ng, hơgei, hiôk chơt lơ̆m sơnăm 2045 nhen ‘meh vă đơ̆ng Đảng, Teh đak păng tơdrong hơgăt mă Hop akŏm Đảng bộ dêh char Thanh Hóa  ‘măng mă XX hlôi tơlĕch ăn. 

Vă jang đei tơdrong hơgăt âu, Đảng bộ, khŭl kơdră chĕp kơ̆l, lĭnh păng kon pơlei dêh char athei hơtŏk tơdrong joăt joe nuih mơng păng dôm jơnei iŏk đei; hơmet pơ ‘lơ̆ng mă đei 1,2 tơdrong tam mă ‘lơ̆ng, kơ kĕ tơrăn; lăng kiơ̆ dôm ƀai hŏk gĭt kăl lơ̆m tơdrong jang pơjing Đảng, pơjing khŭl jang chĭnh trĭ, lơ̆m tơdrong jang vei lăng teh đak tơ̆ rim tơdrong jang krê hơmơt, pơmat; yak hloh dôm tơdrong pơmat tat, long nol ƀơ̆t măt; mĭnh jơhngơ̆m hơnhăk Thanh Hóa hơnơ̆ng hơtŏk tơiung hrĕnh păng kơjăp ‘lơ̆ng.