Tơ̆ jơ tơƀơ̆p, Phŏ Thủ tướng Bùi Thanh Sơn pơma hơdăh Việt Nam ling lang lăng kăl hơtŏk tơiung tơdrong pơvei hăm Trung Quốc; lăng ‘lơ̆ng trong jang hơtŏk tơiung ‘lơ̆ng păng dôm jơnei gĭt kăl đơ̆ng tơdrong pơvei 2 Đảng, 2 teh đak khei ‘năr âu ki. Phŏ kơdră teh đak Hàn Chính hôn bơnê kơ Phŏ Thủ tướng Bùi Thanh Sơn năm ngôi tơ̆ Trung Quốc, vang pơgơ̆r ‘Măng hop akŏm ‘măng mă 16 Anih pơgơ̆r jang 2 pang; pơma hơdăh Trung Quốc tôch kơ lăng kăl tơdrong pơvei jang hơdai gĭt kăl tôm tơdrong, tơpôl vang tơgŭm tơ̆ hơnăp kơnh đei tơdrong jang gĭt kăl hăm Việt Nam, ling lang lăng ‘nâu jĭ trong jang tơgŭm hơdrol lơ̆m trong jang tơgŭm jang tơbôl tơ teh đak tơ jê̆ kơ Trung Quốc, tơgŭm Việt Nam pơgơ̆r tơdrong jang tơplih ‘nao, kơmăy kơmŏk hơgei, teh đak ‘lơ̆ng rŏ, pơjing jơnei chủ nghĩa xã hội.

Tơ̆ hơnăp kơnh, 2 păh drơ̆ng nơ̆r hơtŏk loi dơ̆ng athei rim kơdră, rim anih jang, rim tơring 2 teh đak jang hơdai kơjăp, hơdrin tơlĕch jang dôm tơdrong drơ̆ng nơ̆r păng hlôh vao atŭm đơ̆ng kơdră kơpal, tơgop jang ‘lơ̆ng hloh dơ̆ng tơdrong pơvei Jang hơdai gĭt kăl tôm tơdrong, Tơpôl vang tơgŭm băl tơ̆ hơnăp kơnh Việt Nam - Trung Quốc đei tơdrong ‘lơ̆ng gĭt kăl.