VOV4.Bahnar - Phó Thủ tướng Lê Minh Khái truh hơ pong tơ̆ Anih vei lăng tĕch mơ dro apŭng plenh tĕh (WTO) tơ̆ Geneva, Thụy Sĩ, păng bơ̆ jang hăm Phŏ Kơ dră chĕp kơ̆l WTO Trương Hướng Thần.

Tơ̆ jơ bơ̆ jang, Phó Thủ tướng Lê Minh Khái pơ ma hơ dăh Việt Nam năng kăl tơ drong jang đơ̆ng WTO vă tưk tơ iung tơ drong tĕch mơ dro lơ pang, rơ đăh rơ đong, ‘moi kiơ̆ khôi luơ̆t, hŭt lê̆ dôm tơ drong thuê̆ găn trong, tang găn trong vei lăng tĕch mơ dro kơ dih, hơ pơi ‘mĕh WTO hơ nơ̆ng hơ tŏk hơ năp chĕp kơ̆l pơ gơ̆r vă tưk tơ iung tơ drong tĕch mơ dro lơ̆m plei tĕh kiơ̆ lơ trong hơ tŏ băl, tơ gop ăn tơ drong jang tơ iung ming dơ̆ng păng jang tŏk mŭk drăm.

Ƀât mă tơ drong chinh trĭ păng mŭk drăm lơ̆m apŭng plenh tĕh oei đei lơ tơ drong krê, ƀok Trương Hướng Thần hơ pơi ‘mĕh Việt Nam hơ nơ̆ng tơ gop ‘lơ̆ng ăn tơ drong pơ ma nuh lơ̆m hop akŏm đe ƀok Kơ dră WTO ‘măng mă 12 lơ̆m khei 6 truh vă gơ̆h iŏk đei dôm tơ drong ‘lơ̆ng, mă loi jĭ găh tơ drong tơ gŭm ăn jang ka hơ dang păng choh jang xa, kiơ̆ đơ̆ng nŏh vang tưk tơ iung tơ drong tĕch mơ dro lơ̆m plei tĕh.

Dơ̆ng: Tơ blơ̆