VOV4.Bahnar - Kơ sơ̆ ‘năr 8/7,  tơ̆ Anih jang kơ Khŭl kơ dră teh đak, Bí thư Trung ương Đảng, Phŏ Thủ tướng Lê Minh Khái pơ gơ̆r ‘măng hop akŏm Anih pơ gơ̆r jang vei lăng kơ jă đơ̆ng Khŭl kơ dră teh đak pơ tôch tơ drong jang vei lăng kơ jă 6 khei âu ki, trong vă jang vei lăng 6 khei hơ tuch sơ năm.Pơ tôch ‘măng hop akŏm, Phŏ Thủ tướng Lê Minh Khái tơ roi rơ đăh, tơ drong jang vei lăng kơ jă đơ̆ng dang ei truh hơ tuch sơ năm kăl hơ nơ̆ng jang kiơ̆ 1 trong pơ ‘lơ̆ng păng kơ chăng athei vei sơ đơ̆ng răh tơ drong hơ tŏk kơ jă lơ jô̆ păh lăp lơ̆m sơ năm 2022 kiơ̆ tơ drong hơ găt khŭl kơ dră teh đak păng Kuôk hô̆i pơ jao, đơ̆ng noh pơm tơ drong hiôk ăn tơ drong vei lăng lơ̆m sơ năm truh. Phŏ Thủ tướng athei, rim anih tơm, anih jang tơ ring ưh kơ gơh pơm pơ hơi mă loi ‘noh jĭ lơ̆m khei ‘năr kơ jă đak dâu apŭng plĕnh teh tam mă đei ƀôh ‘lơ̆ng; akŏm băt hơ dăh tơ drong tơ chĕng hơ len kơ jă, tơ lĕch trong jang vei lăng mă lăp hloh.

Thuem: Tơ blơ̆