Kơsơ̆ 13/1 tơ̆ Anih jang kơ Khul kơdră tĕh đak, Bí thư Trung ương Đảng, Phó Thủ tướng Lê Minh Khái sơng ƀok Park Hark Kyu, Kơdră chĕp kơ̆l Grŭp jang Samsung Electronics vei lăng jên hu oei năm hơpong păng bơ̆ jang tơ̆ tĕh đak bơ̆n. Tơ̆ jơ sơng, Phó Thủ tướng Lê Minh Khái pơma hơdăh tơdrong pơ vei jang tơbôl đơ̆ng Việt Nam - Hàn Quốc đei hơyak tŏk pran păng dang ei oei mât lơ̆m khei ‘năr jang tŏk ‘lơ̆ng hlŏh.

Hàn Quốc hlôi jing tĕh đak jang hơdoi gĭt kăl hăm Việt Nam lơ̆m rim tơdrong, mă loi găh mŭk drăm, tĕch mơdro păng tơmât jên jang. ‘Nâu kŭm jing tơdrong ‘lơ̆ng vă Samsung kŭm nhen dôm anih tĕch mơdro kơ Hàn Quốc hơnơ̆ng pơih xă tơdrong tơmât jên jang tơ̆ Việt Nam tơ̆ hơnăp kơnh.

Kơdră chĕp kơ̆l Samsung ăn tơbăt, kơdih kâu ƀok đei hlŏh 20 ‘măng năm tơ̆ Việt Nam vă hơlen năng anih jang xa, tĕch mơdro, lơ̆m nŏh đei tơdrong tơchơ̆t tơmât jên man hnam kơmăy đơ̆ng Samsung tơ̆ Thái Nguyên. Kơdră chĕp kơ̆l Samsung ăn tơbăt: Samsung kŭm krao hơvơn dôm công ty kon pơm man hình, kơmăy điên tư, hơnơ̆ng tơmât jên jang tơ̆ Việt Nam tơ̆ hơnăp kơnh.