VOV4.Bahnar - Pơ ma tơ̆ Hop akŏm rim sơ năm ‘măng mă 52 Grŭp jang mŭk drăm apŭng plĕnh teh (pơ gơ̆r tơ̆ Davos, Thụy Sỹ), Phŏ Thủ tướng teh đak Lê Minh Khái pơ ma hơ dăh ƀơm ưh kơ ‘lơ̆ng đơ̆ng tơ drong rơ hiŭng rơ hiăng hơ dai đơ̆ng jĭ hơ buh COVID-9 păng tơ drong kơ hret chĭnh trĭ tŏk bŏk pơm ăn dôm tơ drong đei ƀơm ưh kơ ‘lơ̆ng tam mă ƀiơh đei ăn tĕch mơ dro phe ƀa tơ mam sa jơ̆p plei teh.

Phŏ Thủ tướng Lê Minh Khái vang hop akŏm WEF 52

Phŏ Thủ tướng tơ roi 5 nơ̆r tơ lĕch gĭt kăl, lơ̆m noh đei tơ drong hơ tŏk loi dơ̆ng jang hơ dai apŭng plĕnh teh, trong jang lơ pang, pơ trŭt hơ năp jang đơ̆ng anih jang apŭng plĕnh teh vă hơ met pơ ‘lơ̆ng dôm tơ drong ƀơm truh tơ drong sơ đơ̆ng phe ƀa tơ mam sa jơ̆p plei teh, lơ̆m noh kăl kơ vei sơ đơ̆ng tơ drong pơ truh phe ƀa tơ mam sa hiôk, hŭt lê̆ tơ drong pơ găn mơ dro sa hăm phe ƀa tơ mam sa, tơ gŭm jên ăn dôm teh đak tŏk bŏk tŏk pơ drŏng, pơ trŭt tơ drong jang hơ dai 3 pang mă Việt Nam tơ lĕch jang đei yua hăm dôm teh đak châu Phi păng châu Mỹ La-tinh; tơ plih ‘nao đon tơ chĕng, pơm tơ drong ‘lơ̆ng ‘nao vă pơ trŭt tơ drong hơ tŏk tơ iung đơ̆ng anih jang choh jang sa păng pơm tơ lĕch phe ƀa, mă loi ‘noh jĭ tơ mơ̆t yua trong jang kơ măy kơ mŏk ‘măng mă 4.

Thuem: Tơ blơ̆