VOV4.Bahnar - Phó Thủ tướng Lê Văn Thành păng Khul jang truh hơ len năng, bơ̆ jang găh tơ drong jang kiơ̆ Trong tơ proh pơm Cham gre păr apŭng plenh tĕh Nội Bài đơ̆ng 2021-2030, trong jang truh sơ năm 2050. Dôm nơ̆r tơ gop lơ̆m jơ bơ̆ jang adoi drơ̆ng nơ̆r hăm tơ drong tơ prŏh trong jang, lơ̆m nŏh tơ drong pơih xă cham gre păr apŭng plenh plenh tĕh Nội Bài pơm lăp hăm tơ drong sơng 100 triu ‘nu tơ moi 1 sơ năm ‘nŏh tôch gĭt kăl.

Phó Thủ tướng Lê Văn Thành truh hơ len năng trong Tơ proh jang pơm hơ met cham gre păr Nội Bài

Pơ ma pơ tôch jơ bơ̆ jang, Phó Thủ tướng Lê Văn Thành akhan, hăm tơ drong jang tơ iung ming, jang tŏk hrĕnh đơ̆ng anih jang gre păr, tơ drong Cham gre păr apŭng plenh tĕh Nội Bài sơng đei 50 triu ‘nu tơ moi 1 sơ năm lơ̆m sơ năm 2030 ‘nŏh rŏ năng gô jang đei. Phó Thủ tướng pơ ma hơ dăh, jăh hơ met pơ ‘lơ̆ng, kĭ ăn tơ drong tơ proh trong jang; đơ̆ng rŏng kơ đei trong tơ prŏh jang jăh pơm hla ar tơ mât jên jang, jăh tơ roi ăn anih jang kơ pal hơ len năng. Phó Thủ tướng athei dôm anih tơm, anih jang kơ pal đei ƀơm truh jăh bơ̆ jang hrĕnh dôm tơ drong jang đei pơ jao vă adrin pơ gơ̆r man trong gre păr jur tŏk păng hnam sơng tơ moi lơ̆m sơ năm 2024-2025.

Dơ̆ng: Tơ blơ̆