VOV4.bahnar - Kơ sơ̆ ‘năr 11/2, Phŏ Thủ tướng Lê Văn Thành hlôi hop akŏm hăm rim anih tơm, anih jang păng tơ ring găh tơ drong hơ met ăn tơ mơ̆t jên jang rim tơ drong jang pơm trong gre kơ dâu hrĕnh tơ lĕch jang ‘nao lơ̆m jăl jang 2021-2025. Kiơ̆ tơ roi tơ băt đơ̆ng Anih tơm vei lăng trong nơ năm gre kơ dâu, lơ̆m 5 tơ drong jang gĭt kăl kơ teh đak đei 3 tơ drong jang yua đơ̆ng Anih tơm vei lăng trong nơ năm gre kơ dâu pơ gơ̆r ‘noh đei: trong gre kơ dâu hrĕnh Biên Hòa - Vũng Tàu; Trong gre kơ dâu hrĕnh Châu Đốc - Cần Thơ - Sóc Trăng păng trong gre kơ dâu hrĕnh Khánh Hòa - Buôn Ma Thuột păng  2 tơ drong jang yua đơ̆ng tơ ring pơ gơ̆r ‘noh đei; Tơ drong jang pơm Trong ver 4 tơ ring Anih tơm Hà Nội păng Tơ drong jang pơm trong ver 3 pơ lei tơm Hồ Chí Minh kŭm hăm 4 tơ drong jang grŭp A.  Pơ tôch ‘măng hop akŏm, Phŏ Thủ tướng Lê Văn Thành tơ roi rơ đăh, hơ tŏk tơ iung trong gre kơ dâu hrĕnh gô pơm tơ drong ‘lơ̆ng ‘nao ăn hơ tŏk tơ iung mŭk drăm tơ pôl đơ̆ng đĭ đăng rim tơ ring đei trong gre kơ dâu hrĕnh năm klĕch. Tơ dăh tơ lĕch jang hrôih, mă loi ‘noh jĭ lơ̆m chưk hơ met teh gô tơ jur jên tôch kơ tih. Phŏ Thủ tướng tơ băt, Khŭl kơ dră teh đak, Kuôk hô̆i, mă loi ‘noh jĭ Anih tơm chĭnh trĭ hlôi pơ tôch đơ̆ng dang ei truh sơ năm 2025 tơ gŭm hơ drol jên jang vă hơ tŏk tơ iung trong gre kơ dâu hrĕnh.

Thuem: Tơ blơ̆