VOV4.Bahnar - Drơ̆ng nơ̆r krao hơ vơn đơ̆ng Phŏ Thủ tướng teh đak Lê Văn Thành, Phŏ Kơ dră vei lăng Anih jang Châu Âu (EC) Frans Timmermans hlôi đei ‘măng năm tơ mang tơ̆ Việt Nam đơ̆ng ‘năr 17 truh ‘năr 19/2/2022. Pơ gê ‘năr 18/2, tơ̆ ‘măng pơ ma đam đơ̆ng Phŏ Thủ tướng Teh đak Lê Văn Thành păng Phŏ Kơ dră Frans Timmermans, 2 păh tơ ƀôh đon chhôk hơ iă lăng ƀôh lơ̆m khei ‘năr âu ki, mă đơ̆ng pŭ ƀơm ưh kơ ‘lơ̆ng đơ̆ng jĭ hơ buh Covid-19, tơ drong pơ vei Việt Nam – Jơ nŭm Châu Âu (EU) hơ nơ̆ng hơ tŏk tơ iung ‘lơ̆ng.

Jơ pơ ma đam

 EU dang ei jing jơ nŭm jang hơ dai mŭk drăm - hơ tŏk tơ iung gĭt kăl kơ Việt Nam, mă loi ‘noh jĭ tŏk bŏk jing anih tơ gŭm ưh kơ pơ dreo dơ̆ng tih hloh, anih tĕch tơ lĕch tih hloh mă 3, anih răt tơ mơ̆t tih hloh mă 5 păng anih tơ mơ̆t jên jang tih hloh mă 6 kơ Việt Nam.Jên mơ dro sa 2 pang Việt Nam – EU hlôi iŏk đei jơ nei ‘lơ̆ng, đei 57 ti USD đơ̆ng rŏng 18 khei tơ lĕch jang Tơ drong tơ chơ̆t mơ dro sa hiôk hian (EVFTA). 2 păh drơ̆ng nơ̆r hơ nơ̆ng tŭn pran jang kiơ̆ ‘lơ̆ng, đei yua jang hơ dai lơ̆m rim tơ drong jang chĭnh trĭ - tơ bôl, mơ dro sa tơ mơ̆t jên jang, jang hơ dai hơ tŏk tơ iung, choh jang sa, cham char, vei sơ đơ̆ng - khŭl linh.

Thuem: Tơ blơ̆