Kơsơ̆ năr 28/10, tơ̆ Anih jang Khul Kơpal teh đak, Phŏ Thủ tướng Lê Văn Thành xơng Khul jang hơlen kơ Anih tơm dôm tơdrong jang găh Đak dơxĭ păng Ka hơdang – Anih jang Châu Âu (EC) đơ̆ng rŏng kơ khul jang hơlen năm hơlen păng hơmet tơdrong tơroi “theh dreng” găh rôp yâu ka hơdang kư̆ kă, ưh đei tơroi păng ưh đei kiơ̆ tơchơ̆t (IUU) tơ̆ Việt Nam. 

Phŏ Thủ tướng Lê Văn Thành pơma ăh hop akŏm

Tơ̆ jơ xơng, Phŏ Thủ tướng Lê Văn Thành xơkơ̆t, Việt Nam hlôi păng tŏk bŏk adrin kơjung hloh vă xek tơlang tơnăp hloh dôm tơdrong pơkăl đơ̆ng EC hăm tơdrong tang găn rôp yâu IUU hơyak hơtŏk tơ iung tơdrong rôp yâu ka hơdang kơjăp xơđơ̆ng, tơnăp, hơlen kơjăp hloh. Phŏ Thủ tướng pơkăl EC păng rim teh đak vang jang EU pơtoi jang hadoi kơjăp păng tơgŭm kih thuơ̆t tơtom, jô̆ truh tơdrong gĭt kăl kơ jang ka Việt Nam lơ̆m tơdrong pơm kiơ̆ pơkăl đơ̆ng EC găh IUU. Pơkăl đơ̆ng EC xơkơ̆t dôm tơdrong adrin kơ 'nôh tơjră hăm jang IUU păng dôm tơdrong đei jơnei kăp gĭt Việt Nam hlôi đei jơnei păng hrôih xut hŭt lê̆ tơdrong tơbang theh dreng ăn Việt Nam.