Tơ̆ jơ bơ̆ jang, dêh char athei Trung ương jăh tơlĕch tơdrong tơchơ̆t ‘nao ăn tơring Tây Nguyên păng tơring Tơter đak dơsĭ găh Pơbăh kơ Tơring tŏk bŏk; pơ ‘nhŏ jên pơm trong Đông - Tây păng tơgŭm dang 200 ti hlak jên vă hơmet pơ ‘lơ̆ng hiong răm đơ̆ng sar bar. Phó Thủ tướng Mai Văn Chính tơchĕng ‘lơ̆ng tơdrong adrin đơ̆ng dêh char mưh hơmet ming khul bơngai jang, trong pơm hla ar păng vei kơjăp tơdrong jang tŏk.

Phó Thủ tướng athei Đắk Lắk hơtŏk đon kơchăng, hơtŏk hrĕnh tơdrong tơlĕch jên jang, hơtŏk tơdrong đei yoa; hơlen năng dôm tơdrong vă jang lơ̆m sơnăm 2025, adrin jang tŏk dang 8%, năng kăl truh dôm tơdrong jang tih, gĭt kăl vă jang tŏk. Atŭm hăm ‘nŏh tơrek truh tơdrong arih xa kơ kon pơlei tơ̆ tơring hơtăih yăih, kon pơlei kon kông; vei kơjăp tơdrong sơđơ̆ng tơpôl tơklep hăm vei lăng ‘lơ̆ng tơdrong sơđơ̆ng teh đak.