‘Năr 12/10, tơ̆ Đà Lạt, Hop akŏm Pơtrŭt tơmơ̆t jên jang dêh char Lâm Đồng sơnăm 2025 pơtơm pơgơ̆r pơih blŭng hăm tơdrong vang truh akŏm đơ̆ng Phŏ Thủ tướng Nguyễn Hòa Bình, kơdră chĕp kơ̆l dôm anih tơm, anih jang păng vă jê̆ 750 ‘nu bơngai tang măt, bơngai tơmơ̆t jên jang lơ̆m, ‘ngoăih teh đak. Phŏ Thủ tướng Nguyễn Hòa Bình lăng ‘lơ̆ng đon pơ hnŏng đơ̆ng Lâm Đồng – tơring teh akŏm tơdrong đei yua ‘lơ̆ng găh groi kông, bri păng đak dơsĭ, roi tơbăt 132 tơdrong jang krao hơvơn tơmơ̆t jên jang sơnăm 2025 păng 358 tơdrong jang jăl jang 2026–2030.

Khŭl kơdră teh đak pơkăp yak hơdai hăm dêh char Lâm Đồng ‘moi kiơ̆ 4 grŭp trong jang tih: jang pơkeh trong jang, hơmet ming hơnih tơmơ̆t jên jang, tơgŭm hơdrol jên jang ăn anih jang gĭt kăl; iŏk yua trong jang tơgŭmh ơdrô̆ vă hơtŏk tơiung mŭk drăm rơgoh. Phŏ Thủ tướng kŭm athei dêh char akŏm hơmet pơ ‘lơ̆ng pơmat tat, mă loi ‘noh jĭ lơ̆m iŏk pơ ‘ngoăih teh, pơm hiôk jên jang vă tŭn hrĕnh dôm tơdrong jang.