VOV4.Bahnar - Pơ gê ‘năr 17/3  tơ̆ Anih jang Khŭl kơ dră teh đak, Bơ ngai jang lơ̆m Anih tơm Chĭnh trĭ, Phŏ Thủ tướng Phạm Bình Minh pơ gơ̆r ‘măng hop akŏm trực tuyến vă mơ̆ng dôm Anih tơm, anih jang tơ roi tơ băt găh tơ drong jang kiơ̆ dôm tơ drong jang tơm teh đak jăl jang 2021-2025 hlôi đei Thủ tướng teh đak kĭ ăn ‘noh jĭ Tơ drong jang tơm teh đak hơ tŏk tơ iung mŭk drăm - tơ pôl tơ ring kon pơ lei kon kông păng tơ ring groi kông; Tơ drong jang tơm teh đak tơ jur dơ nuh hin kơ jăp păng Tơ drong jang tơm teh đak pơ jing tơ ring tơ rang ‘nao.

Pơ tôch hop akŏm, Phŏ Thủ tướng Phạm Bình Minh athei, Anih vei lăng hơ drĕch kon kông, Anih tơm vei lăng găh bơ ngai jang lĭnh jĭ rơ ka păng tơ pôl păng Anih tơm vei lăng găh choh jang sa păng hơ tŏk tơ iung tơ ring tơ rang tơ tĕnh jang đang dôm tơ drong hơ găt lơ̆m khei 3 vă pơ truh ăn Anih chĕp kơ̆l pơ gơ̆r Kuôk hô̆i găh klăih song jên jang ăn rim tơ drong jang tơm kơ teh đak. Phŏ Thủ tướng tơ roi rơ đăh, tơ drong hrôih hơ met ming tôm tơ drong trŏ luơ̆t ‘noh tôch kơ kăl vă tơ lĕch jang đei yua dôm tơ drong jang tơm teh đak tơ̆ hơ năp kơnh.

Thuem: Tơ blơ̆