Dang ei, Viê̆n Sinh hŏk hlôi sơng iŏk, răk vei 37.610 kơcheh kơting linh lôch tang đơ̆ng 08 tơring. Atŭm hăm kơcheh kơting linh lôch tang, Hơnih jang tŏk bŏk oei pơtơm iŏk pham 'nhŏng oh linh lôch tang vă hơlen pơkăp hơdah, jang atŭm hăm hơnih vei lăng ADN 'nhŏng oh kơyuơ Hơnih tơm jang Kanh sat vei lăng sơđơ̆ng tơpôl, Hơnih tơm Kŏng ang vei lăng.

Pơma ah jơ pơm jang, Phŏ Thủ tướng Phạm Thị Thanh Trà pơtruh nơ̆r hăm Viê̆n Han lâm Khua hŏk păng Kŏng ngê̆ Việt Nam sơkơ̆t hơlen lăng mă blŭng gah tơdrong pơm hơdrol kiơ̆ trong 'nao, tơroi hăm Jơnŭm pơgơ̆r jang, Thủ tướng păng Phŏ Thủ tướng teh đak; Pơih lăm hŏk gah kơmăi kơmŏk 'nao ăn khul jang hơlen pơkăp AND… Kiơ̆ đơ̆ng noh tơlĕch jang drơ̆ng minh hăm dôm hơnih jang iŏk kơcheh, sĕch pham 'nhŏng oh, vă sơkơ̆t hơdah hơnăn măt ăn linh lôch tang.