VOV4.Bahnar - Yua đơ̆ng ƀơm kơ nê̆ đơ̆ng ‘mi kial hơ bŭt kơ sô̆ 4, đơ̆ng gơ măng ‘năr 27/9 truh ‘năr 28/9, tơ ring Quảng Trị, Thừa Thiên - Huế, Đà Nẵng, Quảng Nam, Quảng Ngãi, Kon Tum đei ‘mi tôch kơ tih hăm ‘mi đei ƀôh 250-350 mm, đei tơ ring hloh 450 mm. Tơ ring Quảng Bình, Bình Định, Gia Lai đei ‘mi tih truh ‘mi tôch kơ tih hăm ‘mi đak ƀôh 100-200 mm, đei tơ ring hloh 300 mm. Truh pơ gê hrôih ‘năr 28/9, ‘mi kial hơ bŭt kơ sô̆ 4 hlôi tak klĕch tơ̆ kông pơm ăn kial jăng tơ̆ jơ̆p tơ ring Quảng Trị, Đà Nẵng, Quảng Nam, Quảng Ngãi, Bình Định, Phú Yên, Kon Tum păng Gia Lai, đơ̆ng rŏng kơ ‘noh, ‘mi kial hơ bŭt tak rĭ tơ̆ tơ ring pơ băh Lào.

Tơ̆ ‘măng hop akŏm Anih pơ gơ̆r jang tang găn hăm ‘mi kial hơ bŭt kơ sô̆ 4 gơ măng hei (27/9), Phŏ Thủ tướng Lê Văn Thành tơ tă, ‘mi kial hơ bŭt tôch kơ jăng hăm kơ sô̆ 13, 14, jăng truh kơ sô̆ 17, đei hloi ‘mi tih. Yua thoi noh, kăl kơ akŏm mă brĕ, hơ vơn đĭ đăng rim khŭl linh, pơ đĭ hloi khŭl jang chĭnh trĭ đơ̆ng Trung ương truh tơ ring tơ lĕch dôm trong jang vă dŏng kon pơ lei. Tơ jră hăm ‘mi kial hơ bŭt kơ sô̆ 4 kiơ̆ lơ̆m jơ hngơ̆m đon jang tơ tĕnh păng tơ tĕnh hloh dơ̆ng, đĭ đăng yua kơ hơ kâu jăn, mŭk drăm kơ kon pơ lei, iŏk hơ kâu jăn ‘noh kăl hloh, ưh kơ lê̆ kon pơ lei yua kơ dŏng mŭk drăm mă ƀơm ưh kơ ‘lơ̆ng truh hơ kâu jăn.

VOV-Thuem: Tơ blơ̆